Хэдхэн хоногийн өмнө (наймдугаар сарын 16-ны өдөр) мэргэжлийн снукер биллиардын ДАШТ-ээр 2019/2020 улирал өндөрлөсөн билээ. 

Тэгвэл өнгөрсөн улиралд хамгийн өндөр амжилт үзүүлсэн оны шилдэг тамирчнаар 2019 оны дэлхийн аварга бөгөөд дэлхийн чансааг тэргүүлэгч Жадд Трамп нэрлэгдсэн байна. Тэрээр нэг улиралд чансаа олгох зургаан тэмцээнд түрүүлсэн (World Open, International Championship, Northern Ireland Open, German Masters, Players Championship, Gibraltar Open) анхны тамирчин болсон юм. Өнгөрсөн онд ч мөн Жадд Трамп оны шилдэг тамирчин болж байсан ба 2011 оноос хойш Жон Хиггинс, Марк Селби аваргууд хоёр удаа, Ронни О Сулливан аварга гурван удаа оны шилдэг тамирчнаар нэрлэгдэж байжээ. 

Өнгөрөгч ДАШТ-ий үеэр цорын ганц 147 оноо авсан тоглогч бол домогт Жон Хиггинс байлаа. Тэрээр өөрийн каррьерийнхээ 10 дахь, ДАШТ-д анх удаа снукер биллиардын хамгийн дээд оноо буюу 147 оноог авсан нь оны онцлох мөч байлаа. 

ДАШТ-ий дараа дэлхийн чансаа шинэчлэгдсэн ба чансааг Жадд Трамд тэргүүлсэн хэвээр байгаа бол зургаа дахь удаагаа дэлхийн аварга болсон домогт Ронни О Сулливан чансаа ахиж 2-т эрэмбэлэгдэх болсон байна. Мөн түүнчлэн ДАШТ-д үзүүрлэсэн Кайрен Вилсон өөрийн карьерийнхээ хамгийн өндөр чансаа буюу 6-д эрэмбэлэгдэх болжээ.