Мэргэжлийн снукер биллиардын чансааны оноо олгох World Grand Prix 2020 тэмцээний шөвгийн 4-ийн эхний хоёр тамирчин тодорлоо.

Урьд шөнө хэд хэдэн сонирхолтой тоглолтууд явагдсан ба эдгээрээ онцлох тоглолтуудыг тоймлон хүргэж байна. 

Р.О.Сулливаныг хожигдоно гэж хэн ч төсөөлөөгүй биз

Энэ удаагийн дэлхийн гранпри тэмцээнд түрүүлэх магадлал өндөртэй тамирчдын магнайд домогт Ронни О Сулливан бичигдэж байсан ч тэр шөвгийн 4-т орж чадсангүй. Шөвгийн 8-ын тоглолтод Шотландын Грийм Доттой учраа таарсан ба сүүлийн 9 жилийн хугацаанд Ронни түүнд нэг ч хожигдоогүй үзүүлэлтээр бооцоо тавигчид бүгд Роннид бооцоо тавьсан гэхэд болно. Гэвч санаанд оромгүй тоглолт болж 5:3 харьцаагаар Гримм Дотт ялалт байгуулан шөвгийн 4-т үлдлээ. 

 Ж.Трампыг аз ивээсэнгүй

Урьд шөнийн тоглолтуудын бас нэгэн дуулиан бол дэлхийн чансааг тэргүүлэгч Ж.Трамп шөвгийн 16-д хожигдон тэмцээнээс хасагдлаа. Тэрээр өөрийн мөнхийн өрсөлдөгч К.Вилсонд 4:3 харьцаагаар хожигдсон юм. Хоёр тамирчны хувьд 2018 онд дөрвөн тэмцээнд учраа таарах бүрийд Кайрен Вилсон хожсон бол 2019 онд гурван удаа учраа таарах бүрийд Жадд Трамп хожсон байдаг. Харин энэ удаад К.Вилсоны хожих ээлж болсон бололтой. 3:3 харьцаагаар тэнцээд сүүлийн шийдвэрлэх тоглолт үнэндээ л "алаан" болсон. Сүүлийн гурван шаар үлдэхэд тэдний оноо 50:50 болж тэнцсэн байлаа. Манай сайт уг тоглолтыг шууд дамжуулан үзүүлсэн ба та нөхөж үзэхийг хүсвэл ЭНД дарна уу.