Мэргэжлийн снукер биллиардын Герман мастерс тэмцээн нэгдүгээр сарын 29-ний өдрөөс хоёрдугаар сарын 2-ны хооронд зохион байгуулагдаж өндөрлөлөө. 

1995 оноос хойш зохион байгуулагдаж ирсэн Герман опен тэмцээн нь 1998 оноос нэрээ өөрчлөн Герман Мастерс нэртэйгээр зохион байгуулагдах болсон ба 2011 оноос дэлхийн чансааны оноо олгох чансаа өндөртэй тэмцээн болон өөрчлөгдсөн байна.

Энэ удаагийн тэмцээний финалд дэлхийн чансааг тэргүүлэгч Ж.Трамп болон дэлхийн чансааны 3-т эрэмбэлэгдэж буй Нейл Робертсон нар тунан үлдсэн байна. Хоёр тамирчны хувьд хамгийн сүүлд өнгөрсөн оны "Champion of Champions" буюу аваргуудын аварга шалгаруулах тэмцээний финалд тунан үлдэж байсан ба уг тоглолтод тун тэнцүүхэн өрсөлдөөний дүнд 10:9 харьцаагаар Нейл Робертсон хожиж байлаа. Харин энэ удаад Ж.Трамп 9:6 харьцаагаар хожил байгуулж Нейл Робертсонд хариуг нь барьлаа. 

Өнөөдөр мэргэжлийн снукер биллиардын бас нэгэн чансааны оноо олгох тэмцээн болох 2020 World Grand Prix тэмцээн эхэлнэ. Манай сайт тус тэмцээнийг мэдээ, мэдээллийг шуурхай хүргэх болно.