Мэргэжлийн снукер биллиардын дэлхийн чансаа олгох Scottish Open тэмцээн Шотланд улсын Гласгов хотноо зохион байгуулагдаж байна.
Энэхүү тэмцээн нь Home Nations цувралын 2019/2020 улирлын гурав дахь тэмцээн юм. Home Nations цуврал тэмцээн нь Их Британийн бүрэлдэхүүн багтах дөрвөн улсад зохион байгуулагддаг нэр хүнд, чансаа өндөртэй цуврал тэмцээн бөгөөд энд: Northern Ireland Open, Scottish Open, Welsh Open, English Open гэсэн дөрвөн тэмцээн багтдаг. Нэг улиралд цувралын бүх тэмцээнд түрүүлсэн тамирчин 1 сая фунт буюу монгол мөнгөөр 3.5 тэрбум орчим төгрөгийн шагнал хүртэх болзолтой тэмцээнүүд гэхээр шагналын сангийн хувьд маш өндөр юм. 2016 оноос анх зохион байгуулагдаж эхэлсэн уг цувралын бүх тэмцээнүүдэд түрүүлсэн тамирчин одоогоор хараахан төрөөгүй байна.
2019/2020 улирлын хувьд English Open тэмцээнд Марк Селби, Northern Ireland Open тэмцээнд Жадд Трамп нар тус тус түрүүлээд байна.
Яг одоо зохион байгуулагдаж буй Scottish Open тэмцээний 64 тамирчны тоглолтууд урьд шөнө явагдаж дууслаа. Өнөөдөр снукер биллиард сонирхогчдодоо урьд шөнө явагдсан нэгэн тоглолтыг онцлон толилуулж байна. Хэдхэн хоногийн өмнө өндөрлөсөн UK Championship тэмцээний финалд өрсөлдсөн Шотландын Стефен Магуир болон Ази тивийн төлөөлөл болох Хонг Конгийн Марко Футэй тоглосон тоглолтыг сонгон бүрэн эхээр нь толилуулж байна. Учир нь маш сайн формтой байгаа Стефен Магуирыг энэ удаад хожино хэмээн ихэнх бооцоотой тавигчид түүнийг дэмжиж байсан ч үр дүн эсрэгээр гарлаа. Тоглолт 4:2-ын харьцаагаар Марко Фугийн ялалтаар өндөрлөлөө. Урьд нь хоёр тамирчны хувьд 18 удаа учраа тааран тоглоход Стефен Магиур 11 удаад нь Марко Фуг хожоод байсан ч энэ удаад эх нутагтаа зохион байгуулагдаж буй тэмцээнд бүдэрлээ.
