ЗГХЭГ-ын дарга Г.Занданшатар УИХ-ын чуулганд оролцсон гишүүдийн 88.1 хувийн саналаар УИХ-ын даргаар сонгогдсон бөгөөд үүнтэй зэрэгцээд дараагийн ЗГХЭГ-ын дарга хэн байх вэ гэсэн асуулт олны дунд өрнөсөн. 

Монгол улсын Засгийн газрын гишүүн, Монгол улсын сайд, ЗГХЭГ-ын даргад МАНАН бүлэглэлийн эсрэг жагсаалыг удирдсан УИХ-ын гишүүн Л.Оюун-Эрдэнэ, Т.Аюурсайхан нарын нэр хүчтэй яригдаж байсан юм.

Л.Оюун-Эрдэнэ гишүүний хувьд "УИХ-ын шинэ даргын хувьд нийгмийн хүлээлтэд тохирох хүнийг гаргаж тавиарай. Тохирох, хуйвалдах, хөшигний ардах байдлаар битгий хандаасай. Олон сонгогдсон хүн УИХ-ын дарга болох ёстой" гэж байр суурьтай байгаагаа илэрхийлж байсан билээ. 

Сая хуралдаж өндөрлөсөн МАН-ын Удирдах зөвлөлийн хурлаар ЗГХЭГ-ын даргад УИХ-ын гишүүн Л.Оюун-Эрдэнийг 100%-ийн саналаар дэмжсэн байна. 

МАН-ын Удирдах зөвлөл өнөөдөртөө багтаж дахин хуралдана. Энэ удаагийн хурлаар Зам тээврийн хөгжлийн сайд болон Боловсрол, соёл, шинжлэх ухааны сайд сайдын нэрийг тодруулах аж. Ерөнхий сайд У.Хүрэлсүх өмнөх сайдуудыг чөлөөлөх УИХ-ын чуулган дээр хэлсэн үгэндээ парламентээс дараагийн сайдуудыг тодруулах талаар дурдсан.

Одоогоор БСШЭС-ийн сайдад УИХ-ын гишүүн Ж.Мөнхбат, ЗТХ-ийн сайдад УИХ-ын гишүүн Б.Энх-Амгалан нарын нэрс яригдаж байна.

---