УИХ-ын гишүүн Л.Оюун-Эрдэнэ шинэ УИХ-ын даргын талаар байр сууриа илэрхийллээ.  

-"Миний томилсон хүмүүс намайг хамгаална гэж боддог бодлоосоо М.Энхболд салах ёстой. Би Ерөнхий сайд байхдаа Ө.Энхтүвшин, Н.Энхболд хоёрыг томилж байсан, миний эсрэг явсанд харамсаж байна гэсэн яриа бол угаасаа буруу. Ийм байдлаар хүмүүсийг барьцаалж, ийм байдлаар хүний санал өгөх эрхэд нь халдаж болохгүй. 

УИХ-ын шинэ даргын хувьд нийгмийн хүлээлтэд тохирох хүнийг гаргаж тавиарай. Тохирох, хуйвалдах, хөшигний ардах байдлаар битгий хандаасай. Олон сонгогдсон хүн УИХ-ын дарга болох ёстой. 

М.Энхболд дарга бид хоёрын хооронд олон маргаан болж байсан. Намайг шүүхэд өгсөн байна лээ. Шүүх дээр зарим баримтуудыг гаргаж тавина. 

"Монголын зэс корпораци" ХХК маш хариуцлагагүй үйлдэл хийсэн. Бүртгэлийн газар дээр бүртгүүлэхээр бичиг баримтаа өгсөн байсан. Тус компанийн захирал Ц.Пүрэвтүвшин компанийн хувьцаагаа Сингапур дахь өөрийн компани руугаа шилжүүлэх оролдлого хийсэн. Итгэмжлэгдсэн төлөөлөгч охин нь өөрийнх нь туслах, орчуулгын товчооны ажилтан шиг байгаа юм. 400 сая ам.доллараар үнэлэгдэж байсан ордыг 40 саяар үнэлсэн. 

Эрдэнэтийн 49 хувийг авсан дотор чинь Монголросцветметийн 49 хувь бий, Хөтөлийн цемент, Багануур ХК тэр чигээрээ бий. Үүнийг би МАНАН гэж нэрлээд байгаа юм. 

Сүхбаатарын талбайн өмнөх цэцэрлэгийг ХХБ авчихсан байна шүү дээ. Засгийн газрын ордны өөдөөс хараад өндөр байшин баригдахаар зураг төсөл нь хийгдчихсэн байна. Үүнийг хэн гарын үсэг зурж өгсөн нь тодорхойгүй байна. Үүнийг хуйвалдаан гэж үзэх үү? Энэ асуудал хууль хяналтын байгууллага дээр ирэхгүй байна. Тэр бүлэглэлийн гар хөл болсон хүмүүс хууль хяналтын байгууллагад олноороо байна" гэлээ.   

---