Шайбтай хоккейн 18 хүртэлх насны эмэгтэйчүүдийн дэлхийн аварга шалгаруулах тэмцээн зохион байгуулагдаж байна. 

Энэ сарын 4-ний өдөр эхэлсэн 17 дахь удаагийн дэлхийн аварга шалгаруулах тэмцээнд уламжлал ёсоор найман баг хоёр хэсэгт хуваагдан өрсөлдлөө. А хэсгийг дэлхийн есөн удаагийн аварга АНУ, В хэсгийг дэлхийн долоон удаагийн аварга Канадын баг тус тус тэргүүлэн өрсөлдөж уламжлал ёсоор тус хоёр улс аваргын алтан медалийн төлөө өрсөлдөхөөр тунан үлдээд байна. Уламжлал ёсоор хэмээн хэлсний учир нь: 2008 оноос эхлэлтэй энэхүү дэлхийн аварга шалгаруулах тэмцээнд одоогоор АНУ болон Канадаас өөр улсын баг хараахан түрүүлж чадаагүй байгаа юм. 

Өнөөдөр медалийн төлөөх тоглолтууд явагдах хуваарьтай байгаа ба дээр дурдсанчлан алтан медалийн төлөө Канад болон АНУ-ын багууд өрсөлдөх бол хүрэл медалийн төлөө дэлхийн хошой мөнгө, таван хүрэлтэй Швед болон нэг мөнгө, хошой хүрэл медальтай Чехийн багууд өрсөлдөхөөр тунан үлдээд байна. 

Хагас шигшээд Канад Чехийг 4:2 харьцаагаар буулган авсан бол АНУ-ын баг Шведийг 2:1 харьцаагаар тус тус хожиж шигшээд тунан үлдсэн юм.