Аж үйлдвэрийн сайд асан Д.Эрдэнэбат нарын 20 хүнд холбогдох хэргийн урьдчилсан хэлэлцүүлгийг Сүхбаатар дүүргийн Эрүүгийн хэргийн анхан шатны шүүх хэлэлцэж, прокурорт буцаах шийдвэр гаргалаа. Энэ асуудлаар нэхэмжлэгч талын өмгөөлөгч З.Буяндаваагийн байр суурийг сонслоо. 

Өмгөөлөгч З.Буяндаваа: 

-Үндэсний аюулгүй байдал энэ улсын тусгаар тогтнолтой холбоотой асуудал учир шүүхэд итгэх шаардлагатай. Гэхдээ иймэрхүү хэргээс болж улс орон хэдэн их наяд төгрөгөөр хохирдог асуудал цаашид үргэлжилсээр байх уу гэдэг асуултад шүүгч нар хариулаасай. Шүүх нэг гараараа яллагдагчийг явуулж, нөгөө гараараа яллагдагчийг эзгүйд хэргийг шийдэхгүй гэдэг байдлаар шийдвэр гаргаж болохгүй. Хохирогч нарын өмгөөлөгчдийн зүгээс захирамжтай холбоотой гомдлыг давж заалдах шатны журмаар гаргана. Хохиролтой холбоотой асуудалд шинжээч нар ажилласан. Шинжээч нар ажилласан нотлох баримт хавтаст хэрэгт байгаа. Шүүхийн гол үндэслэл нь хэргийг буруу тусгаарласан гэж байгаа. Ч.Сайханбилэг, Д.Эрдэнэбилэг гэдэг хүмүүсийг эзгүйд энэ асуудлыг шийдэж болохгүй гэдэг асуудлыг л шүүх яриад байна гэв.

---