Хөтөлийн "Цемент шохой" үйлдвэр 58 сая төгрөгийн үргүй зардал гаргасан гэх аудитын дүгнэлтэд тус компанийн захирал Л.Наранбаатар тайлбар өгсөн билээ. Тэрбээр үргэлжлүүлэн ТУЗ-д ажилладаг ч ашиг сонирхлын зөрчилтэй гэгдэх хүмүүсийг зарлав.

Хөтөлийн "Цемент шохой" ТӨХК-ийн Гүйцэтгэх захирал Л.Наранбаатар:

-Нэр бүхий төлөөлөн удирдах зөвлөлийн гишүүд “Сахал” Д.Эрдэнэбилэгтэй холбоотой байсныг би өнөөдөр мэдлээ. ТУЗ-ийн гишүүн, Аудитын хорооны дарга н.Буянхишиг байгаль орчны мэргэжилтэй, Аудитын хороог жил гаран удирдаж байна. Санхүүгийн мэргэжилтэй хүн байх ёстой ч санхүүгийн мэдлэггүй, хувийн ашиг сонирхлоор ханддаг, хуурамчаар гарын үсэг зуруулж, “Шүүр”, “Шүгэл” ажиллагаанд өртөж байгаа хүмүүстэй нэгддэг.

Мөн ТУЗ-ийн Нэр дэвшүүлэх хорооны дарга асан З.Энхболд Хууль зүйн яаманд ажилладаг. Намайг ажлаа аваад удаагүй байхад маск шахсан. Арга буюу би авсан. ТУЗ дээр дандаа эсэргүү зүйл ярьдаг. Шохойн үйлдвэр барих зэргийг эсэргүүцдэг, хэрэггүй гэдэг. Тэр хүн өнөөдөр Хөтөлд очиж амьдарч үзсэн үү? Ийм хүмүүс ТУЗ-өөс зайлах хэрэгтэй. ТУЗ-ийн дарга н.Баяр-Эрдэнэ ашиг сонирхлын зөрчилтэй хэмээв.

---