Жүдо бөхийн дэлхийн аварга шалгаруулах тэмцээн эхлэхэд 16 хоног үлдээд байна.
Узбекистан улсын Ташкент хотноо зохион байгуулагдах жүдо бөхийн насанд хүрэгчдийн ДАШТ-д өнөөдрийн байдлаар 80 орны 520 бөх оролцох урьдчилан мэдүүлгээ өгөөд байна. Таван орон орон эрэгтэй, эмэгтэй тус бүр есөн тамирчин буюу бүтэн багаар оролцох мэдүүлгээ өгөөд байгаагийн нэг нь монголын баг байна.
ДАШТ гэдэг утгаараа бүх жинд дэлхийн шилдгүүд оролцох мэдүүлгээ өгөөд байгаа ба олимпын гурван алт, хошой хүрэл, дэлхийн 10 удаагийн аварга Францын домогт Тедди Рине аварга бэртлийн улмаас ДАШТ-ий өнжиж буйгаа албан ёсоор мэдэгдлээ. Түүний оронд эрэгтэйчүүдийн +100кг жинд Францаас түрүү жилийн Парисын их дуулгын хүрэл медальт Жозеф Терхек оролцох болсон байна. Т.Рине аварга 2017 оноос хойш ДАШТ-д оролцоогүй ба энэ удаагийн ДАШТ-д оролцохоор бэлтгэлээ базааж байсан бэртлийн улмаас ийнхүү дэвжээнд гарах боломжгүй болжээ.
