Ерөнхий сайд Л.Оюун-Эрдэнэ Монгол Улсын Засгийн газрын бүтцийн тухай болон Засгийн газрын бүрэлдэхүүний тухай хуульд тус тус нэмэлт, өөрчлөлт оруулах тухай хуулийн төслийг УИХ-ын дарга Г.Занданшатарт өргөн барьсан билээ.

Ерөнхий сайдын оруулж ирсэн нэрсэд:

• Засгийн газрын хэрэг эрхлэх газрын даргаар МАН-ын ЕНБД Д.Амарбаясгалан,
• Хот хариуцсан сайдаар  УИХ-ын гишүүн Ж.Сүхбаатар,
• Байгаль орчны сайдаар УИХ-ын гишүүн Б.Бат-Эрдэнэ,
• Эдийн засаг, хөгжлийн сайдаар УИХ-ын гишүүн Ч.Хүрэлбаатар,
• Нийгмийн хамгаалал, хөдөлмөрийн сайдаар УИХ-ын гишүүн Б.Сарангэрэл,
• Зам тээврийн хөгжлийн сайдаар УИХ-ын гишүүн С.Бямбацогт,
• Хүнс, хөдөө аж ахуй, хөнгөн үйлдвэрийн сайдаар УИХ-ын гишүүн Х.Болорчулуун,
• Цахим хөгжил, харилцаа холбооны сайдаар УИХ-ын гишүүн Н.Учрал,
• Эрчим хүчний сайдаар УИХ-ын гишүүн Б.Чойжилсүрэн,
• Уул уурхай, хүнд үйлдвэрийн сайдаар УИХ-ын гишүүн Ж.Ганбаатар нар байна.

Харин "давхар дээл"-тэй дөрвөн сайдыг хэвээр үлдээж, "дан дээл"-тэй дөрвөн сайдыг улирааж байгаа талаар бид өмнө нь мэдээлсэн.

Л.Оюун-Эрдэнийн Засгийн газар нь  Ерөнхий сайд болон 21 гишүүнтэй, бүтцийн хувьд ерөнхий чиг үүргийн 4, чиглэлийн 12 яамтай байхаар хуулийн төсөлд тусгажээ. 

УИХ-ын чуулганаар шинэ сайдуудыг томилох асуудлыг хэлэлцэж байна. Хэлэлцэж буй асуудалтай холбогдуулан гишүүд асуулт асууж, хариулт авч байна.

УИХ-ын гишүүн Т.Доржханд:

-АН-тай хамтарсан Засаг байгуулах гэж байгаа асуудал чинь хэвээрээ юу? Манай ХҮН бол хамтрахгүй.

УИХ-ын гишүүн Б.Пүрэвдорж:

-АН-ын гишүүдийг засагт оруулж ажиллуулъя гэдэг яриа яваад байна. 1997 оноос хойш долоон удаа хамтарсан Засгийн газар байгуулагдаж, дөрөв нь олонх болоогүй тохиолдолд хамтраад явж байсан. Гурав нь стандарт бус шийдвэр гаргаж, хамтарч Засаг байгуулж байсан. 

АН-ын гишүүд дотор маш их хуваагдал бий болгож байна. Нэг болохоор хамтарсан засагт оруулах тухай манай бүлгийн дарга яриад байдаг. Гэтэл танай бүлгийн дарга АН-тай ярьсан зүйл байхгүй гэж ярьж байгаа нь асуудалд итгэлтэй хандах боломж өгөхгүй байна.

Ерөнхий сайд Л.Оюун-Эрдэнэ:

-Дэлхий дахинд цар тахал тогтворжсон ч ОХУ-д дайны нөхцөл байдал үүссэнээс болж манай улсад түлш шатахуун, уул уурхайн тэсэлгээний бодис, хүнсний бүтээгдэхүүнтэй холбоотой амаргүй асуудал үүсч байна. Гарах гарц нь шинэ сэргэлтийн бодлого.

Зөвхөн МАН гэхгүй уг бодлогыг дэмжиж байгаа аль ч нам, хөрөнгө оруулагчтай идэвхтэй хамтран ажиллана. Гэхдээ хамтарсан Засгийн газрын асуудлаар албан ёсоор Удирдах зөвлөлд ярьсан зүйл байхгүй. Ерөнхийлөгч илүү эв нэгдэлтэй том төслүүдээ анхаарах тал дээр улс төрөөс илүүтэй анхаарах цаг үе хэмээн сануулж хэлж байна. Тиймээс том төслүүдээ урагшлуулна гэвэл улс төрийн ямар ч шийдвэр гаргахад би эрх баригч намын даргын хувьд нээлттэй байгаагаа илэрхийлж байна. Ямар байдлаар ойлгогдоод хэвлэлээр явж байгааг харж амжсангүй гэв. 

---