Монгол улсын Засгийн газрын бүтцэд өөрчлөлт орох гэж байна. ҮХНӨ-өөр Монгол улсын Ерөнхий сайдад танхимаа өөрөө бүрдүүлэх онцгой эрх өгсөн бөгөөд Л.Оюун-Эрдэнэ энэхүү эрхээ эдэлж, шинэчилсэн бүтэц бүрэлдэхүүнээ өнөөдөр танилцуулна. Энэ ажил маргааш гэхэд дуусна гэж эх сурвалж баталлаа. “Батламж”-ийг өнөөдөр хуралдах МАН-ын Удирдах зөвлөлөөс гаргана.

Зарим хэвлэлийн бичиж байгаа шиг Ерөнхий сайд огцорно гэдэг нь ташаа мэдээлэл. УИХ буюу УИХ-ын гишүүд үгсэн хуйвалдаж Засгийн газрыг огцруулдаг явдал ҮХНӨ-өөр хаагдсан учир Л.Оюун-Эрдэнэ бүрэн эрхийн хугацаагаа дуусгах болов уу.

Баттай эх сурвалжийн авсан мэдээллээр, “давхар дээл”-тэй дөрвөн сайд буюу С.Амарсайхан, Х.Нямбаатар, Б.Жавхлан, Л.Энх-Амгалан нар үлдэх болжээ. Мөн, “дан дээл”-тэй дөрвөн сайд буюу Б.Батцэцэг, Ч.Номин, А.Ариунзаяа, Г.Сайханбаяр нар үлдэнэ. Өөрөөр хэлбэл, Засгийн газрын танхимын бараг 50 хувь нь шинэчлэгдэнэ.

Харин, Засгийн газрын Хэрэг эрхлэх газрын дарга, Байгаль орчин, аялал жуулчлал, Эрүүл мэнд, Барилга, хот байгуулалт, Зам, тээвэр хөгжил, Уул уурхай, хүнд үйлдвэр, Эрчим хүчний сайд нар солигдохоор болжээ.

УИХ-ын хэн, хэн гэдэг гишүүн сайд болох нь вэ гэдгээсээ илүү маргааш байгуулагдах Шинэ сэргэлтийн Засгийн газарт АН-ынхныг урьсан нь хамгийн их анхаарал татаж байна.

“7 сарын 1”-ний хэрэг явдлын дараа С.Баяр Хамтарсан Засгийн газар байгуулахаар тогтож АН-ыг урьж байсан. “7 сарын 1” шиг харуусам үйл явдал гараагүй байгаа энэ цаг үед АН-ынхныг урьсан нь онц сонирхолтой байгаа юм. Эх сурвалжийн мэдээлснээр АН-ынхныг урьсан бөгөөд тэд хэнийгээ сайдад зоох вэ гэдэг дээр “зодолдоод” нэлээд хэд хонож байгаа нь үнэн байна.

Шинээр сонгогдох долоон сайдад АН орох эсэхийг мөн өнөөдөр хуралдах МАН-ын Удирдах зөвлөл шийднэ.

Ямартай ч ҮХНӨ-өөр Ерөнхий сайд Л.Оюун-Эрдэнэ хэнтэй ч үл хуваалцах дархан эрхээ эдэлж, Засгийн газрын бүтэцдээ өөрчлөлт оруулах гэж байна.

Засгийн газар огцрох бол ноцтой асуудал. Харин Засгийн газрын сайд нар солигдох нь жам ёсны үзэгдэл. Нарийндаа үүнд сонирхол татахаар зүйл багатай. Учир нь “давхар дээлгүй” шинэковууд сайд хийх зангараггүй гэдэг нь өнгөрсөн хугацаанд хангалттай харагдлаа шүү дээ.

---