Маргааш байгуулагдах Шинэ сэргэлтийн Засгийн газарт Ардчилсан намынхныг урьсан талаар бид мэдээлсэн. Төрийн ордонд өнөөдөр хийсэн С.Эрдэнэ, Б.Ганбат нарын хэвлэлийн бага хурлаар ч үүнийг баталлаа.

Гэхдээ тамга барьж байгаа, Дээд шүүх болон УБЕГ, СЕХ албан ёсоор батламжилсан С.Эрдэнийн АН-д бус, О.Цогтгэрэлийн АН-д Ерөнхий сайдын зүгээс “Засгийн газарт орох” санал тавьсан болж таарлаа.

Энэ талаар УИХ дахь АН-ын бүлгийн дарга асан (одоо УИХ дахьн АН-ын зөвлөлийн дарга) Б.Ганбат “Сандал суудлын төлөө маш аймшигтай зүйл цаана чинь болж байна. АН-ын 4-5 хүн сайд болно гээд гүйгээд байгаа. Ийм зүйл болохгүй байх. Сайдыг нь өгөх ч үгүй байх. Ер нь бол мал комбинатын ямаа гэж байдаг даа. Бусдыгаа уриалж оруулаад заазлуулчихдаг. Ийм л зүйл болох гээд байна” гэв.

Харин, АН-ын дарга С.Эрдэнэ "Эвслийн Засгийн газарт АН-ыг орох гэж байна гэх цуу яриа гараад байгаа. АН-аас  Засгийн газарт орох талаар ямар ч шийдвэр гараагүй" гэв. 

Улмаар тус хэвлэлийн хурлаар шинэчлэгдсэн байгуулах Засгийн газарт С.Эрдэнийн АН-аас орохгүй гэдгийг тодотгоод, намын үндсэн дүрмийг ноцтой зөрчсөн УИХ-ын гишүүн О.Цогтгэрэл, С.Одонтуяа, Ш.Адышаа, Б.Бейсен нарыг АН-аас хөөж байгааг мэдэгдэв. Давхар дээлтэй холбоотой ҮХЦ-ийн шийдвэр дээр УИХ дээр намын байр суурийг хамгаалаагүй, хариуцлагагүй хандсан учир хөөлөө гэв. 

Үнэндээ бол Шинэ сэргэлтийн Засгийн газарт орохоор "гүйгээд" байгаа гишүүдээ намаасаа хөөв бололтой. 

---