Шри Ланка улсад үүсээд буй эдийн засгийн хямрал болон шатахууны хомстлыг эсэргүүцэн жагсаж байсан иргэд рүү цагдаа нар гал нээсний улмаас нэг хүн амиа алдаж, 11 хүн шархаджээ.

Энэхүү эсэргүүцлийн хөдөлгөөн энэ сарын эхээр эхэлснээс хойш цагдаа нар ийнхүү анх удаа иргэд рүү гал нээсэн байна. Рамбукана хотод болсон энэ явдлаас өмнө хотын оршин суугчид шатахуун шаардаж, 15 цагийн турш жагсаад байжээ.

Бүс нутгийн Цагдаагийн газрын хэвлэлийн төлөөлөгч Нихал Талдува "Цагдаа нар жагсагчдыг хянахын тулд гал нээх шаардлагатай болсон. Цугларсан олон автомашины дугуй шатааж, цагдаа нар руу чулуу болон бусад зүйл шидэж байсан тул тэднийг тараахын тулд ийм арга хэрэглэхээс өөр аргагүйд хүрсэн" хэмээн мэдэгдсэн юм.

Тус улсын Засгийн газар нэн шаардлагатай бараа бүтээгдэхүүнүүдийг импортлох мөнгөгүй болж, хоол хүнс, эм тариа, түлш шатахууны ноцтой хомстол нүүрлэснээс хойш иргэд хэдэн арван мянгаараа жагсаж, Ерөнхийлөгч Готабая Ражапаксаг огцрохыг шаардаж байгаа ч тэрээр огцрохоос татгалзаж байгаа билээ. Мөн тэрээр өнгөрөгч даваа гарагт шинэ сайд нарын танхимаа томилсон нь иргэдийн дургүйцлийг төрүүлээд байна.

Шри Ланкийн шатахууны гол борлуулагч компани шатахууны үнээ бараг 65 хувиар нэмсний дараа эсэргүүцлийн жагсаал улам хүчээ авах болжээ. Уурлаж бухимдсан олон мянган жолооч нийслэл Коломбог Канди хоттой холбосон хурдны замыг тээврийн хэрэгслээрээ хааж, их хэмжээний дугуй шатааж байгаа юм.

Эх сурвалж: BBC

---