Дарханы төмөрлөгийн үйлдвэрийг төр буцаан авах албан шаардлагыг Дархан-Уул аймгийн иргэд өнөөдөр мэдэгдсэн. Уг шаардлагыг Дархан-Уул аймгийн Засаг даргад хүргүүлсэн юм.

Аймгийн Засаг дарга Б.Азжаргал тэдний шаардлагыг хүлээн авч Дарханы төмөрлөгийн үйлдвэрийг улсад буцаан авах тал дээр анхаарч ажиллана гэдгээ мэдэгдсэн.

Ингээд тус аймгийн иргэд, залуучууд Дарханы төмөрлөгийн үйлдвэрийг концессын гэрээгээр авсан “Кью Эс Си” компанид шаардлага хүргүүлсэн юм.

Уг шаардлагад: Төмөрлөгийн үйлдвэрийн орд баялагыг төр ард түмэн буцаан авах болно. Дарханы төмөрлөг, Хөтөлийн “Цемент шохой”, Эрдэнэтийн 49 хувь зэрэг төрийн өмч хөрөнгийг дээрэмдэн авсан улс төр, санхүүгийн бүлэглэлийн том төлөөлөгч Д.Эрдэнэбилэгт танд Дарханы иргэд бид энэхүү шаардлагыг хүргүүлж байна.

Япон улсын зээл тусламжаар байгуулагдсан Дарханы төмөрлөгийн үйлдвэр, Төмөртэй, Төмөртолгой, Хустайн орд баялгийг концесс нэрээр дээрэмдэн авсан булхайг таслан зогсоож, өөрсдийн өмч хөрөнгөө эргүүлэн авах тэмцлээ эхлүүлснийг мэдэгдье. Ерөнхийлөгч асан Х.Баттулга, Ерөнхий сайд асан Н.Алтанхуяг, Ч.Сайханбилэг, УИХ-ын дарга асан З.Энхболд нартай үгсэн хуйвалдаж, концесс нэрээр төмөрлөгийн үйлдвэр орд газруудтай хамтад үнэ төлбөргүйгээр дээрэмдэн авсан гэмт үйлдэл чинь хөдөлшгүй баримтаар илчлэгдлээ.

2014 онд Н.Алтанхуягийн, 2015 онд Ч.Сайханбилэгийн Засгийн газрын тогтоолыг хуйвалдан захиалга гаргуулж, концесс нэрийн дор төмөрлөгийн үйлдвэрийг гурван ордтой нь сохор зоосны үнэгүй дээрэмдэн авсан.

Д.Эрдэнэбилэг та өөрийн хөрөнгөөр үйлдвэрт хөрөнгө оруулж, арматур ган бөмбөлөг зэрэг эцсийн бүтээгдэхүүн гаргадаг металл уургын цогцолбор байгуулна гэж худал амлан концессоор аваад, төмрийн хүдрийг нь түүхийгээр нь анхан шатны боловсруулалт хийсэн төдийгөөр Хятад руу зөөж, 2014-2021 оны хооронд 2 их наяд төгрөгийн орлого олсон. 30 жилийн концессын хугацаанд уг ордын баялгийг нь ховх сорох гэж байгааг таслан зогсоохыг үүгээр мэдэгдэж байна.

Сүүлийн 8 жилийн хугацаанд газар нутгийн баялгийг зөөж, зарж байгаа мөртлөө улсад болон Дархан хот, Дарханчуудад ямар ч өгөөжгүй үйлдвэр болоод байна.

Энэ хугацаанд улсад татвар төлөөгүй, цаашлаад үйлдвэр барина гэж “Хөгжлийн банкнаас” зээл хүртэл авсан. Иймд хууль бус концессын гэрээг цуцалж, улсад хохирлоо барагдуулан, Дарханы төмөрлөгийн үйлдвэр болон гурван ордыг улсад буцаан олгоно уу хэмээн шаардаж байна.

Бид бүхний шаардлагын хариуг 24 цагийн дотор хариу мэдэгдэхгүй бол тэмцлийн хурц хэлбэрт шилжих болно гэсэн юм.

Дарханы иргэдийн тавьсан шаардлагыг Дарханы төмөрлөгийн үйлдвэрийн үйлдвэр хариуцсан дарга н.Энхчулуун гэх хүн хүлээн авч холбогдох удирдлагуудад танилцуулах болно гэлээ.

---