Дархан-Уул аймгийн ЗДТГ-аас зохион байгуулж буй “Иргэдийн индэр” нээлттэй уулзалтын үеэр аймгийн Засаг дарга Б.Азжаргалд Дарханы төмөрлөгийн үйлдвэрийг төр буцаан авах албан шаардлагыг иргэд хүргүүлж буйгаа мэдэгдсэн.

Уг шаардлагын хүрээнд тус үйлдвэрт 2019 оны наймдугаар сар хүртэл ажиллаж байсан иргэн дараах мэдээллийг аймгийн Засаг даргад өгсөн юм.

Иргэн: “Кью Эс Си” компани нь концессын гэрээгээр Дарханы төмөрлөгийн үйлдвэрийг төрөөс авснаас хойш ажилчдын цалинг 2014 онд 50 хувь нэмсэн ч улирлын болон шагнал цалинг боддоггүй. 2019-2020 онд ажилчдын цалинг 10 хувь нэмсэн ч тухайн үед арматур 1.2 сая төгрөг байхад ажилчдын дундаж цалин 1.1 сая төгрөг байсан.

Одоо арматурын үнэ 3 сая төгрөг давсан үед ажилчдын дундаж цалин 1.4 сая төгрөг байна. Дарханы томоохон үйлдвэр цаашлаад хүнд нөхцөлд ажиллаж байгаа ажилчдын дундаж цалингаас бага цалинг Дарханы төмөрлөгийн үйлдвэрийн ажилчид авч байна. Гэтэл “Кью Эс Си” компаниас томилогдсон захирал, дарга нар нь 30 сая төгрөг, ажилчид нь 4 сая төгрөгийн цалин авдаг.

Өнөөдөр Дарханы залуучууд бид нар төмөрлөгийн үйлдвэрээ төр буцаан авах хэрэгтэй гэж үзэн Засаг даргад шаардлага хүргүүлж байна. Цаашлаад, "Сахал" Д.Эрдэнэбилэгийн “Кью Эс Си” компанид ч хүртэл шаардлага хүргүүлнэ.

Дархан-Уул аймгийн Засаг дарга Б.Азжаргал: 

-Иргэд, залуус маань нээлттэй үзэл бодлоо илэрхийлж, шаардлага хүргүүлж байгааг сайшааж байна. Тэдний шаардлагатай танилцаж, Засгийн газарт шаардлагыг нь уламжлах болно.

Өнгөрсөн жилээс Дарханы төмөрлөгийн үйлдвэртэй хамтран ажиллах гэрээ байгуулж, 2021 оны аравдугаар сард гангийн үйлдвэр барих 28 га талбайг аймгаас шийдэж өгсөн.

“Кью Эс Си” компани өнгөрсөн хугацаанд ажил хийгээгүй шалтгаанаа орон нутгаас газар олгоогүй гэж ярьдаг байсан. Иймд өнгөрсөн жил 28га талбай газар өгсөн ч гангийн үйлдвэрийн барилгын ажил өнөөдрийг хүртэл эхлээгүй байна.

Дарханы төмөрлөгийн үйлдвэрийг төр буцаан авах хүсэлт илэрхийлсэн залуучуудыг хүлээн авч уулзах болно. Дархан-Уул аймгийн иргэний хувьд уурхайгаас төмрийг хүдрийг их хэмжээгээр гаргаж байгаа ч концессын гэрээгээр хүлээсэн үүрэг болох үйлдвэр барих ажил зогсонги байгаад сэтгэл дундуур байна. Төр эргүүлэн авах ч бай үгүй ч бай аймгийн зүгээс гангын үйлдвэрийн ажлыг эхлүүлэх шаардлагыг “Кью Эс Си” компанид тавих болно хэмээн дурдлаа.

---