Израилын Тель-Авив хотод сүүлийн жилүүдэд тохиогоогүй цуст халдлагууд болсны дараа Ерөнхий сайд Нафтали Беннет галт зэвсгийн зөвшөөрөлтэй иргэдийг өөрсдийгөө зэвсэглэхийг уриалжээ.

Беннет өнгөрөгч лхагва гаргийн орой хийсэн мэдэгдлийнхээ үеэр "Израилын иргэд сонор сэрэмж, хариуцлагатай байх ёстой. Бууны лицензтэй иргэд одоо л зэвсгээ биедээ авч явах хэрэгтэй" хэмээн уриалсан байна. Коронавирусийн халдвар авсны улмаас тусгаарлалтад байгаа Ерөнхий сайд Беннет улс орноо "айдсын шинэ давлагаа"-тай тулгарсан хэмээн онцолсон юм.

Тэгвэл Батлан ​​хамгаалахын сайд Бенни Гэнц цагдаагийн хүчээ мянган цэргээр бэхжүүлж, Палестины нутаг дэвсгэр дэх Израилын цэргийн оролцоог нэмэгдүүлэх тушаал өгсөн байна.

Өнгөрөгч мягмар гарагт Тель-Авив хотын захад нэгэн палестин эрэгтэй зэвсэгт халдлага үйлдэж, таван хүнийг хөнөөсөн нь сүүлийн долоо хоногт тохиосон гурав дахь халдлага болсон бөгөөд амиа алдагсдын тоо нийт 11 болж өссөн билээ. Үүнээс өмнө, өмнөд нутгийн Беершеба хотод Исламын улс бүлэглэлийг дэмжигч араб этгээд дөрвөн хүнийг хутгалж, хороосон бол хойд нутгийн Хадера хотод мөн араб иргэн халдлага үйлдэж, цагдаагийн хоёр алба хаагчийн аминд хүрсэн юм.

Эх сурвалж: The Guardian, BBC

---