Хөгжлийн банкны гүйцэтгэх захирал асан Б.Батбаярыг нэг сар цагдан хорих шийдвэрийг Сүхбаатар дүүргийн Эрүүгийн хэргийн анхан шатны шүүхээс гаргасан талаар бид мэдээлсэн. Удаад нь Хөгжлийн банкны дэд захирал Ч.Мөнхбаярыг нэг сар цагдан хорих шийдвэрийг мөн гаргасан байна. Үүнтэй холбогдуулж, түүний өмгөөлөгч Б.Баатарсайханы байр суурийг хүргэж байна.

Өмгөөлөгч Б.Баатарсайхан: 

-Хөгжлийн банкны захирал асан Ч.Мөнхбаярт шүүхээс 30 хоногийн таслан сэргийлэх арга хэмжээ авлаа. Янз бүрийн хүнд нөлөөлнө гэсэн үндэслэлээр ийм шийдвэр гаргалаа. Шүүгчийн захирамжид гомдол гаргана.

Прокурорын санал хууль бус, албан хэрэг бүртгэлийн шаардлага хангаагүй, дутуу санал дээр үндэслэсэн гэж үзэж байна. Нөлөөлөх асуудал тогтоогдохгүй, хууль бус гэж өмгөөлөгчийн зүгээс үзэж байгаа. Ч.Мөнхбаяр нь Хөгжлийн банкны захирлаар 2016-1019 онд ажиллаж байсан. Түүнийг албан тушаалаа урвуулан ашиглаж бусдад давуу байдал олгосон гэсэн асуудлаар гурав дахь жилдээ шалгагдаж байна. Гэмт хэргийн асуудлыг нь шалгах болохоос энэ тэрэнд зээл өгсөн, тэр зээлд нь хамаатай гэж шүүмжлэх нь буруу байх. Зээл авсан хүмүүс нь зээлээ төлөх нь шударга ёсны зарчимд нийцнэ. Энэ хүмүүсийн үйлдэл холбогдлыг Үндсэн хуульд заасны дагуу шүүхээр тогтоож байж энэ хүмүүсийн гэм буруугийн асуудлыг халдааж ярих нь зүйтэй гэж хэлмээр байна гэв.

---