Канадын Ерөнхий сайд Жастин Трюдо коронавирусийн халдвар авсан болохоо өнгөрөгч даваа гарагт мэдэгджээ.

Трюдо цар тахлаар өвчилсөн хүнтэй ойрын хавьтал болсон бөгөөд тав хоногийн тусгаарлалтад орж байгаагаа өнгөрсөн долоо хоногт мэдээлээд байсан билээ. Тэрээр вакцинжуулалтад бүрэн хамрагдсан ба энэ сарын эхээр нэмэлт тунгаа тариулсан аж.

Жастин Трюдо албан ёсны мэдэгдэлдээ "Хоёр жилийн дараа ч коронавирусийн эсрэг тэмцэл бидний амьдралын олон хэсэгт давамгайлсан хэвээр байна. Энэ вирус бидэнд бүгдэд нь нөлөөлж байгаа. Миний хоёр хүүхэд өмнө нь халдвар авсан бөгөөд өнөөдөр өглөө миний шинжилгээний хариу "Эерэг" гарсан. Биеийн байдал маань сайн байгаа бөгөөд ямар ч шинж тэмдэг илрээгүй" хэмээн тэмдэглэжээ.

Түүний эхнэр Софи Грегуар Трюдо 2020 оны 3 дугаар сард буюу цар тахлын эхэн үед халдвар авсан юм.

Канадад тээврийн жолооч нарын тэргүүтэй эсэргүүцлийн хөдөлгөөн үргэлжилж байгаа ба жагсагчид нийслэл Оттава хотын төвд гудамжнуудыг хаагаад байгаа билээ. Энэхүү нөхцөл байдлын улмаас Ерөнхий сайд Жастин Трюдюгийн гэр бүлийг Ридо Коттеджийн оршин суух газраас нь аюулгүй байршилд нүүлгэн шилжүүлжээ.

Эх сурвалж: UPI

---