Казахстаны эрх баригчид шатахууны үнийг нэмсний улмаас олон мянган иргэн жагсаж, Ерөнхийлөгч Касым-Жомарт Токаев онц байдал зарлаад байгаа билээ. Тэгвэл тус улсын Засгийн газар огцрох хүсэлт гаргасныг Токаев хүлээж авсан гэж мэдэгджээ.

Ерөнхийлөгчийн зарлигт "Бүгд Найрамдах Казахстан Улсын Үндсэн хуулийн 70 дугаар зүйлд заасны дагуу Засгийн газрын огцрох хүсэлтийг хүлээн авахаар шийдвэрлэж байна. Казахстан Улсын Ерөнхий сайдын түр үүрэг гүйцэтгэгчээр Смаилов Алихан Асхановичийг томилов" хэмээн бичсэн байна.

Уг шийдвэрийн дагуу Засгийн газрын гишүүд шинэ сайд нарын танхим бүрэлдэх хүртэл үүрэгт ажлаа үргэлжлүүлэн гүйцэтгэх юм. Ерөнхий сайд асан Аскар Мамин 2019 оны 2 дугаар сараас хойш тус албыг хашиж байсан бол Смаилов нь Ерөнхий сайдын нэгдүгээр орлогч байсан аж.

Түүнчлэн Алматы хотод эсэргүүцлийн хөдөлгөөн намжиж, албаныхан нөхцөл байдлыг хяналтдаа аваад байгааг бүс нутгийн эрх баригчид мэдээлжээ.

Эх сурвалж: TASS

---