ОХУ-ын Ерөнхийлөгч Владимир Путин ирэх оны 2 дугаар сард БНХАУ-ын Бээжин хотноо болох Өвлийн олимпын наадмын үйл ажиллагаанд оролцохоо мэдэгджээ. Ингэснээр тэрээр тус спортын арга хэмжээнд оролцохоо зарласан анхны томоохон удирдагч болж байгаа юм.

Үүнээс өмнө, дэлхийн хэд хэдэн томоохон улсын удирдагчид "Бээжин-2022" олимпын наадмыг дипломат аргаар бойкотлож, дээд түвшний албан тушаалтнуудаа илгээхгүй гэж мэдэгдээд байсан билээ. АНУ, Их Британи, Австрали, Канад зэрэг улс Хятадын хүний ​​эрхийн зөрчлийн асуудлын улмаас ийм шийдвэр гаргасан. 

Тэгвэл Ерөнхийлөгч Путин өнөөдөр БНХАУ-ын дарга Ши Жиньпинтэй цахим уулзалт хийхдээ Олимпын наадамд зориулж айлчилна гэдгээ амлаад, түүнтэй биечлэн уулзахыг хүлээж байгаагаа тэмдэглэжээ. Тэрээр "Бид олон улсын спортын хамтын ажиллагааны тухайд бие биеэ үргэлж дэмждэг болохыг онцолмоор байна. Тэр дундаа, аливаа спорт болон Олимпын хөдөлгөөнийг улстөржүүлэх оролдлогын эсрэг байр суурьтай байдаг" хэмээсэн байна.

Хятадын улсын зүгээс бойкот хөдөлгөөнд нэгдсэн улс орнуудыг "алдаатай үйлдлийнхээ төлөөсийг төлнө" гэж мэдэгдээд байгаа билээ. Тус улсын Гадаад хэргийн яамны хэвлэлийн төлөөлөгч Ван Вэнбин "АНУ, Их Британи, Австрали улсууд Олимпын тавцанг улс төрийн зорилгоор ашигласан" хэмээн буруушаасан юм.

Эх сурвалж: BBC

---