Их Британи, Канад улсууд "Бээжин-2022" өвлийн олимпын наадмыг дипломат аргаар бойкотлохоо зарлажээ. Үүнээс өмнө, АНУ болон Австрали улсууд мөн адил шийдвэр гаргасан билээ. 

Канадын Ерөнхий сайд Жастин Трюдо энэхүү шийдвэрээ танилцуулахдаа, "Манай улс бойкот зарласан нь БНХАУ-ын хувьд гэнэтийн зүйл болохгүй. Бид сүүлийн хэдэн жилийн хугацаанд хүний ​​эрхийн зөрчлийн талаар гүнээ санаа зовж байгаагаа маш тодорхой илэрхийлсэн" гэж хэлсэн байна.

Их Британийн Ерөнхий сайд Борис Жонсон ч мөн Хятадад хүний ​​эрх зөрчигдөж байгаагийн улмаас төлөөлөгч нараа илгээхгүй гэж мэдэгджээ.

Сүүлийн жилүүдэд Хятад болон барууны хэд хэдэн улс орны хооронд дипломат харилцааны олон асуудлаас болж хурцадмал байдал үүсээд байгаа билээ. Тус улсын Шинжаан бүс нутагт уйгуруудыг албадан хөдөлмөр эрхлүүлж, барьж саатуулж байгаа явдлыг АНУ буруушааж байгаа хэдий ч БНХАУ-ын зүгээс үүнийг удаа дараа няцаасаар ирсэн юм.

АНУ "Бээжин-2022" олимпын наадмын эсрэг бойкот зарласны дараа Хятадын эрх баригчид энэхүү шийдвэрийг хатуу шүүмжилж, хариу арга хэмжээ авна хэмээн сүрдүүлсэн. Мөн Австрали улс адил арга хэмжээ авахаа мэдэгдсэний дараа Хятадын Гадаад хэргийн яамны хэвлэлийн төлөөлөгч Ван Вэнбин Австрали улсыг "улс төрийн бодлого" явуулж байна гэж буруутгажээ. Ван Вэнбин "Тэдний төрийн албан тушаалтнууд ирэх эсэх нь хэнд ч хамаагүй" хэмээсэн байна.

Ийм төрлийн бойкот арга хэмжээний тоо нэмэгдэж байгаа хэдий ч тамирчид оролцох хэвээрээ байгаад Олон улсын олимпын хороо баяртай байгааг тус хорооны Ерөнхийлөгч Томас Бах тэмдэглэсэн юм. Тэрээр "Олимпын наадмын арга хэмжээнд төрийн албан тушаалтнууд оролцох эсэх нь Засгийн газар бүрийн улс төрийн шийдвэр тул ОУОХ төвийг сахих зарчмаа баримталсаар байх болно" хэмээн мэдэгджээ.

Эх сурвалж: BBC

---