АНУ "Бээжин-2022" өвлийн олимпын наадмыг дипломат харилцааны үүднээс бойкотлосон талаар бид мэдээлсэн билээ. Тэгвэл Австрали улс мөн энэхүү бойкотын арга хэмжээнд нэгдэж байгаагаа зарлажээ. Гэхдээ тус улсын тамирчид АНУ-ын тамирчдын адил Олимпын наадамд оролцох хэвээрээ юм.

Уг шийдвэр нь Хятадын Шинжаан дахь "хүний ​​эрхийн зөрчил" болон "Австрали улсын зүгээс өмнө нь хөндөж байсан бусад олон асуудал"-тай холбоотой гэж Ерөнхий сайд Скотт Моррисоны мэдэгджээ. Эдгээр хоёр улсын харилцаа сүүлийн жилүүдэд хурцадсан бөгөөд Австрали улс бойкотод нэгдсэн нь гайхах зүйл биш гэдгийг Моррисон тэмдэглэсэн байна.

Тэгвэл БНХАУ-ын зүгээс АНУ-ын шийдвэрийг буруушааж, хариу арга хэмжээ авна гэж сүрдүүлээд байгаа билээ. Хятадын ГХЯ-ны хэвлэлийн төлөөлөгч Жао Лижиан АНУ-ыг "спортын талбарт улс төрийн төвийг сахих" дүрмийг зөрчин, "худал цуурхал"-д үндэслэсэн бойкот зарласан гэж мэдэгдсэн юм.

Австралиас гадна Канад, Япон зэрэг бусад улс орон ч мөн адил "Бээжин-2022" олимпын наадмыг дипломат аргаар бойкотлох талаар хэлэлцэж байгаа аж. Харин Шинэ Зеланд улс коронавирусийн цар тахлын улмаас албан ёсны төлөөлөгчдөө Бээжин рүү илгээхгүй гэжээ.

Эх сурвалж: BBC

---