БНХАУ-ын нийслэл Бээжин хотноо ирэх онд болох Өвлийн олимпын наадмыг АНУ дипломат харилцааны үүднээс бойкотлохоо зарлажээ.

Хятадын хүний ​​эрхийн зөрчлийн асуудлын улмаас АНУ энэ удаагийн олимпод албан ёсны төлөөлөгчдөө илгээхгүй гэж Цагаан ордноос мэдэгдсэн байна. Гэхдээ тус улсын тамирчид уг спортын наадамд оролцох бөгөөд тэдэнд Засгийн газраас бүрэн дэмжлэг үзүүлнэ гэжээ.

Тэгвэл БНХАУ-ын зүгээс аливаа улс орон бойкот зарлавал "шийдвэртэй хариу арга хэмжээ авна" гэж өмнө нь мэдэгдээд байсан билээ.

Ерөнхийлөгч Жо Байдены засаг захиргаа "Бээжин-2022" өвлийн олимпын наадмыг бойкотлосон нь 1980 оноос хойших ийм төрлийн анхны арга хэмжээ юм. ЗХУ 1979 онд Афганистаныг түрэмгийлснийг АНУ эсэргүүцэн, 1980 оны Москвагийн олимпоос тамирчдаа татан, бойкотлож байсан. Харин ЗХУ болон түүний холбоотнууд үүний хариуд 1984 онд Лос-Анжелес хотноо зохион байгуулагдсан Зуны олимпын наадмыг бойкотлосон юм.

Цагаан ордны Хэвлэлийн нарийн бичгийн дарга Жен Псаки "АНУ-ын Засгийн газар энэ бүх хугацаанд бэлтгэл хийсэн тамирчдаа шийтгэх нь буруу гэж үзэж байгаа хэдий ч албан ёсны төлөөлөгчдөө илгээхгүй байх нь тодорхой мессеж илгээх болно" гэж мэдээлжээ.

Сонирхуулахад, АНУ 2028 онд Зуны олимпын наадмыг зохион байгуулахаар бэлтгэж байгаа юм.

Эх сурвалж: BBC

---