Зам, тээврийн салбарт 2021 онд хийхээр төлөвлөсөн төсөл, хөтөлбөр, бүтээн байгуулалт, түүний биелэлт болон Тяньжин, Эрээн, Замын-Үүд боомтод гацсан чингэлэг, ачаа тээвэр, Гашуунсухайтын нүүрс тээврийн асуудлаар ЗТХЯ-наас өнөөдөр мэдээлэл хийлээ.

Өмнөговь аймгийн Цогтцэций сумын нутаг дахь Тавантолгойн уурхайгаас Говьсүмбэр аймгийн Сүмбэр сум хүртэлх улсын чанартай автозамаар нүүрс тээвэрлэхийг түр зөвшөөрсөн тушаалыг ЗТХ-ийн сайд өнөөдөр гаргасан байна.

Уг тушаалд, Өмнөговь аймгийн ИТХ болон Өмнөговь, Дундговь аймгийн Засаг дарга нарын санал, тээвэрлэлт хийхээр тохиролцон, үйл ажиллагаа явуулж байгаа ААН, тээвэрчдийн эрх ашгийг харгалзан ЗТХ-ийн сайдын 2021 оны аравдугаар сарын 6-ны өдрийн А/158 дугаар тушаалын 5 дахь заалтыг “Энэхүү тушаалыг 2022 оны гуравдугаар сарын 31-ний өдрөөс эхлэн дагаж мөрдөнө” хэмээн өөрчилжээ.

Зам, тээврийн хөгжлийн сайд Л.Халтар:

-Цогтцэций-Чойр чиглэлийн замаар 31 аж ахуйн нэгжийн 450 орчим жолооч тээвэрлэлт хийх зөвшөөрөл авсан. Ерөнхийдөө 1250 орчим жолоочийн бүртгэл байсан. Энэ сард болсон хоёр улсын ерөнхий сайдын цахим уулзалтаар Цагаанхад дээр байгаа 8.2 сая тонн нүүрс бол аль хэдийн БНХАУ-ын худалдан авагч нар авчихсан нүүрс байгаа тул Хятадын талаас хурдан авах сонирхолтой байгаагаа дурдсан. Энэ асуудалд хоёр тал ижил хүчин чармайлт гаргахаар болсон. Сүүлийн 3 өдөрт 380-409 орчим машин гарсан байна. Энэ тоо цаашдаа нэмэгдэнэ. Зам, тээврийн хөгжлийн яамны холбогдох хүмүүстэйгээ нийлэн тэнд болохгүй байгаа ажлуудын жагсаалтыг гаргасан. Энэ бямба гарагт газар дээр очиж, төрийн байгууллагуудад танилцуулна. Чойр руу тээвэрлэх өөр дэд бүтэц алга байна. 

Тавантолгойгоос Зүүнбаян чиглэлийн төмөр замын эхний галт тэрэг яваад ирэх үеэс энэ тээвэрлэлт зогсоно. Өнөөдрийн байдлаар Монгол Улсын нутаг дэвсгэр дээр тээвэрлэлт хийж байгаа хятад жолооч байхгүй.

Дундговь аймаг шинэ маршрут нээсэн мэдээлэл олж авсан. Аймгийн иргэдийн хурлын тогтоолоор өөрийн нутаг дэвсгэр дээр зарим нэг аж ахуйн нэгжид тээвэрлэлт хийхийг зөвшөөрсөн байсан” гэлээ.

"Баянзам" тээвэрчдийн холбоо ТББ-тай хийсэн гэрээгээ Зам, тээврийн хөгжлийн яам цуцалсан тул Дундговь аймгийн удирдлагаас зөвшөөрөл аван уг шинэ замаар тээвэрлэлт хийхээр болсон байна.

---