Дэлхийн 117 улсын 600 гаруй сэтгүүлч 14 эх сурвалжийн мэдээллийг хэдэн сарын турш шүүсний эцэст "Пандора" нэртэй баримтыг дэлгэсэн билээ. Уг цуглуулгад 12 сая орчим баримт материалыг хавсаргасан бөгөөд одоо байгаа болон суудлаасаа буусан дэлхийн 35 удирдагч болоод төрийн өндөр дээд алба хашдаг 300 гаруй эрхмийн татвараас зайлсан, нуусан, оффшор дансанд шилжүүлсэн баримтууд багтсан аж.

Олон улсын эрэн сурвалжлах сэтгүүлчдийн консорциумын удирдлага дор ажилласан сэтгүүлчдийн гаргасан жагсаалтад Монгол Улсын Ерөнхий сайд асан Сүхбаатарын Батболд багтжээ. Тус мэдээлэлд, Сү.Батболд уул уурхайн наймаанаас хэдэн зуун сая ам.долларын хууль бус ашиг хүртсэн гэх хэргээр Монгол, Их Британи, Сингапур болон АНУ-ын шүүхэд дуудагдсан болохыг онцолсон байна.

Харин Сү.Батболдын америк өмгөөлөгч Олон улсын эрэн сурвалжлах сэтгүүлчдийн консорциумын асуултад "Сү.Батболд өөрт нь тулгасан хэргүүдийг эрс үгүйсгэдэг. Ямар ч шүүх эдгээр хэргийг үнэн гэж баталж чадаагүй бөгөөд Лондон, Сингапур, Хонконг, Жерси, Нью-Йорк болон Монгол дахь сүүдэрт нуугдсан этгээдүүд ноён Батболдын эсрэг хэд хэдэн гүтгэлэг бүхий зарга үүсгэсэн" хэмээн хариулжээ.

"Пандора" баримтад дурдсанаар Сү.Батболд 2006 оны 4 дүгээр сард Монгол Улсын Үйлдвэр, худалдааны сайдаар ажиллаж байхдаа Ла-Маншийн хоолой дахь татварын диваажин Гернси арал дээр "Quantum Lake Trust"-ыг байгуулсан аж. Тус компани нь Британийн Виржиний арлууд дахь "Premier Edge Ltd" халхавч компанийг эзэмшдэг байсан бөгөөд Сү.Батболд 2005 онд уг компанийн анхны хувьцаа эзэмшигч болж байсан гэдэг.

Олон нийтийн бүртгэлээс харахад, "Premier Edge Ltd" компани 2006 онд Лондоны нэг барилгын хоёр тансаг зэрэглэлийн орон сууцыг 8.8 сая гаруй ам.доллароор худалдаж авсан байна.

Олон улсын эрэн сурвалжлах сэтгүүлчдийн консорциум энэ талаар тодруулахад Сү.Батболдын зөвлөх Ерөнхий сайд асныг хууль ёсны дагуу үл хөдлөх хөрөнгө худалдан авч, борлуулсан бөгөөд ингэхдээ Монгол Улсын оффшор компаниудаар дамжуулан өмчлөх, хөрөнгө оруулах хууль тогтоомжийг дагаж мөрдсөн гэж мэдэгджээ.

Уг зөвлөх нь "Түүний гэр бүлийн гишүүд Лондонд сурч, ажиллаж байх хугацаандаа тус орон сууцад амьдардаг байсныг Сү.Батболд хэзээ ч нуугаагүй. Энэ бол уул уурхайгаас хууль бусаар ашиг олсон гэх худал мэдээллүүд ил болохоос хамаагүй өмнөх явдал" хэмээжээ.

Эх сурвалж: https://www.icij.org/investigations/pandora-papers/power-players/?player=sukhbaataryn-batbold

---