Өмнөд Солонгосын "SBS" телевизийн алдартай цуврал болох "Penthouse: War in Life 3" нь тансаг зэрэглэлийн орон сууцны сүйрлийг харуулахдаа тус улсын Кванжү хотод нурсан барилгын бодит дүрсийг ашигласан байна.

Кванжү хотод энэ оны 6 дугаар сарын 9-нд болсон ослын улмаас есөн хүн амиа алдаж, найман хүн хүнд шархадсан билээ. Тодруулбал, албаныхны нурааж байсан таван давхар барилга ойролцоо зогсож байсан автобус дээр унасан юм. Харин "Penthouse" цувралын уран бүтээлчид энэхүү золгүй ослын мэдээний дүрсийг ашигласан нь үзэгчид болон уг ослын улмаас гэр бүлийн гишүүдээ алдсан иргэдийн дургүйцлийг хүргээд байгаа аж. 

Цувралыг бүтээгчид түүнчлэн 2017 оны 11 дүгээр сарын 15-нд Поханг хотод болсон 5.4 баллын хүчтэй газар хөдлөлтийн дараа орон нутгийн оршин суугчид биеийн тамирын зааланд хоргодож байгааг харуулсан бодит бичлэгийг ашигласан байна. Тус газар хөдлөлтийн улмаас 92 хүн бэртэж гэмтэн, 1,800 хүн орон гэргүй болж байжээ.

"Penthouse"-ын уран бүтээлчид асуудалтай дүрс бичлэгийг хассан тул цувралын давталт болон "VOD" платформ дээр дахиж гарахгүй гэж мэдэгдсэн бөгөөд ирээдүйд бодит мэдээний дүрсийг зохисгүй ашиглахаас урьдчилан сэргийлэхийн тулд чадах бүхнээ хийнэ хэмээн амласан байна. Тэд мөн албан ёсоор уучлал гуйсан хэдий ч олон нийтийн зүгээс ирүүлж буй шүүмжлэл тасрахгүй байгаа юм. 

Эх сурвалж: The Korea Times

---