ОХУ-ын "Спутник V" коронавирусийн эсрэг вакцины нэг тунтай хувилбар болох "Спутник Light" вакциныг Монгол Улсад албан ёсоор бүртгэн, зөвшөөрсөн талаар Оросын Шууд хөрөнгө оруулалтын сан мэдээлжээ.

Тус сангийн мэдэгдэлд "ОХУ-ын "Спутник Light" нэг тунтай вакциныг Монгол Улсын Эрүүл мэндийн яамнаас бүртгэн авсныг зарлаж байна" хэмээн тэмдэглэсэн байна.

"Спутник Light" нь ерөнхийдөө "Спутник V" вакцины эхний тун гэсэн үг аж. Монгол Улсын Эрүүл мэндийн яамнаас "Спутник V" вакциныг энэ оны 2 дугаар сард бүртгэн авсан бөгөөд тус вакциныг мөн түргэвчилсэн журмын хүрээнд бүртгэн, онцгой байдлын үед ашиглах яаралтай зөвшөөрөл олгосон юм.

ОХУ-ын эрх баригчид "Спутник Light" вакциныг албан ёсоор бүртгэсэн хэдий ч тус вакцины эмнэлзүйн туршилт хараахан дуусаагүй байгаа талаар бид өмнө нь мэдээлж байсан билээ.

Эх сурвалж: TASS

---