Хуульч Х.Болдмандал Монгол улсын ерөнхийлөгч Х.Баттулгыг Үндсэн хууль зөрчсөн эсэх тухай асуудлаар ҮХЦ-д мэдээлэл хүргүүлсэн талаараа мэдээлэл өглөө. 

Хуульч Х.Болдмандал: 

-Монгол улсын Ерөнхийлөгч Х.Баттулга удаа дараа Үндсэн хууль зөрчиж байгаа. МАН-ыг тараах тухай нь үүний оргил нь гэж хэлж болно. Төрийн тэргүүн бол ард түмний эв нэгдлийн бэлгэдэл байх ёстой байтал одоо эвдэн бусниулагч болоод байна. 

Ардчилсан намын Үндсэн дүрмийн хороо /ҮДХ/ны гишүүн Д.Ганбаяр Live TV-д 2021 оны нэгдүгээр сарын 11-нд өгсөн ярилцлагадаа "АН-ын ҮДХ-ны гишүүдийг Монгол улсын Ерөнхийлөгч хүлээн авч уулзахдаа би дахин нэр дэвшинэ, өөрийн хүнээр намын даргаа тавина" гэж хэлсэн байсан. Ерөнхийлөгчөөр сонгогдсон хүн намын гишүүнчлэлээс татгалзаж, улс төрийн намын үйл ажиллагаанд оролцохгүй байх хуультай. 

Мөн, АН-ын дарга С.Эрдэнэ энэ оны гуравдугаар сарын 25-ны 19 цагийн үед Ерөнхийлөгчийн шадар туслах Л.Түвшинжаргал гэдэг эмэгтэй утасдаад, хүнээр дугтуйтай бичиг хүргүүлсэн. Үүн дээр нь, өөрт нь холбогдуулж шалгаж байсан эрүүгийн хоёр хэргийг хэрэгсэхгүй болгосон Нийслэлийн прокурорын орлогчийн шийдвэр байсан. Тэгээд С.Эрдэнийг үгэнд нь орохгүй болохоор нь гурав хоногийн дараа хэрэгсэхгүй болгосон хэргээ буцаан сэргээсэн тухай ярьсан байсан. 

Сүүлийн үед шуугиад байгаа, өмгөөлөгч Б.Баасанцогтын хэрэг дээр удаа дараа шүүгч, прокурор, АТГ, цагдаа нар руу мөнгө шилжүүлсэн. Компьютерээс нь гэмт хэргийг хэрхэн шийдэх шүүхийн схем гарсан байсан шүү дээ. ЕТГ-ын газарт ажилладаг энэ хүнийг Ерөнхийлөгчтэй холбож үзэхээс өөр аргагүй. Тэгэхээр энэ бүхэн нь Монгол улсын Ерөнхийлөгчийг Үндсэн хуулийг удаа дараа зөрчсөн гэдгийн баримт, нотолгоо учир би өнөөдөр ҮХЦ-д хандан мэдээлэл өгч байна. 

-Энэхүү мэдээлэл дээр Цэц маргаан үүсгэвэл цаашид үйл явдал хэрхэн өрнөх вэ? 

-Маргаан үүсгэх эсэхийг ҮХЦ-ийн хэн нэгэн гишүүн нь 14 хоногийн дотор шийднэ. Хэрэв маргаан үүсгээд, үүнийг Үндсэн хууль зөрчсөн гэж үзэх юм бол УИХ-аар хэлэлцэнэ.

---