Мэргэжлийн снукер биллиардын дэлхийн гранпри тэмцээний өрсөлдөөн оргилдоо хүрч байна.
Дэлхийн шилдэг 32 тамирчин өрсөлдсөн тэмцээн яг одоо хагас шигшээ тоглолтуудаар үргэлжлэн явагдаж байгаа ба хагас шигшээд үлдсэн дөрвөн тамирчны гурав нь дэлхийн аварга цолтнууд байлаа. Тодруулбал: Хагас шигшээ эхний тоглолтод дэлхийн зургаан удаагийн аварга Ронни О Сулливан, дэлхийн аварга бөгөөд дэлхийн чансааг тэргүүлэгч Ж.Трамп нар тоглосон юм. Хоёр тамирчны хувьд 28 дахь учраа тааран өрсөлдсөн нь энэ бөгөөд Трамп аварга 15 дахь удаагаа Ронниг хожлоо. Ийнхүү хожил байгуулснаар Ж.Трамп 2019 оны Northern Ireland Open тэмцээнээс хойш гурав дараалан Ронниг аваргыг буулган авч байгаа бөгөөд тэд дэлхийн чансааны 1 болон 3-т эрэмбэлэгдэж буй тул тэмцээнүүдийн хагас шигшээ эсвэл шигшээд тунан үлдэж байгаа юм.
Хагас шигшээ дараагийн тоглолт бол дэлхийн гурван удаагийн аварга Марк Селби болон Жак Ливоски нарын тоглолт байх ба өнөө шөнө (12 дугаар сарын 19-өөс 20-нд шилжих шөнө) явагдах хуваарьтай байна.
