Мэргэжлийн снукер биллиардын "Аваргуудын аварга" шалгаруулах тэмцээнд дэлхийн чансааны 8-д эрэмбэлэгдэж буй Марк Аллен түрүүллээ.
2019 оны "Аваргуудын Аварга" шалгаруулах тэмцээнээс хойш томоохон 20 тэмцээнд түрүүлсэн аваргууд болон ДАШТ-д үзүүрлэсэн тамирчдыг эрэмбэлж шилдэг 16 аварга оролцсон энэ удаагийн тэмцээнд дэлхийн чансааны дагуу урилгаар оролцсон Марк Аллен түрүүллээ. 2013 оноос хойш жил бүр тасралтгүй зохион байгуулагдаж буй тус тэмцээнд Марк Аллен нэг удаа үзүүрлэж байсан бол энэ жил анх удаа түрүүллээ.
Финалын тоглолтод дэлхийн аварга Нейл Робертсонтой тунан үлдэж 10:6 харьцаагаар ялалт байгууллаа. Марк Аллен хэсгийн аваргын төлөө дэлхийн зургаан удаагийн аварга Ронни О Сулливан, хагас шигшээд дэлхийн аварга Жадд Трамп, шигшээ тоглолтод мөн дэлхийн аварга Нейл Робертсон гээд гурван дэлхийн аваргыг ялж жинхэнэ утгаараа Аваргуудын аварга болсон байна.
