Сүхбаатар дүүргийн Эрүүгийн хэргийн анхан шатны шүүх жүжигчин Т.Билэгжаргалд холбогдох хүний биед хүндэвтэр гэмтэл учруулах, мансууруулах бодис, сэтгэцэт нөлөөт бодистой холбоотой хэргийг өнөөдөр хянан хэлэлцээд түүнийг гэм буруутай хэмээн үзэж хоёр жил, найман сар, 10 хоногийн хорих ял оноолоо.

Т.Билэгжаргал нь мансуурсан үедээ төрсөн ээжийгээ зодож буй бичлэг 2020 оны хоёрдугаар сарын 01-ний өдөр олон нийтийн сүлжээнд тавигдсан нь улс орон даяар ихээхэн шүүмжлэл, дуулиан дагуулж байв.

Түүгээр ч зогсохгүй Т.Билэгжаргалд холбогдох гэмт хэргийг Сүхбаатар дүүргийн Эрүүгийн хэргийн анхан шатны шүүх 2020 оны дөрөвдүгээр сарын 21-ний хянах үед СЭМҮТ-өөс “Т.Билэгжаргал нь сэтгэцийн эмгэгтэй, хэрэг хариуцах чадваргүй” гэсэн магадлагаа ирүүлсэн нь олон  нийтийн шүүмжлэлийн бай болсон билээ.

Сүхбаатар дүүргийн эрүүгийн хэргийн шүүх СЭМҮТ-өөс ирүүлсэн магадлагааг таван шинжээчийн бүрэлдэхүүнтэйгээр дахин хянах шаардлагатай үзэж шүүн таслах ажиллагааг хоёр сар хойшлуулсан бөгөөд шинжээчийн дүгнэлтээр Т.Билэгжаргал нь хэрэг хүлээх чадвартай хэмээн гарсан тул хэргийг ийнхүү таслан шийдвэрлэжээ.

 

---