Байгалийн гамшигт үзэгдэл болохтой холбогдуулж НМХГ-аас Барилгын ажил эрхэлж буй аж ахуйн нэгж байгууллагуудад дараах сануулгыг өглөө. 

Салхи шуургатай үед ажиллагчдын болон гуравдагч этгээдүүдийн аюулгүй байдлыг хангаж, өндрийн ажлуудаа түр зогсоох, барилгын хамгаалалтын хашаа хайсны бэхэлгээг сайтар хийх, барилгын талбайн эмх цэгцийг бүрэн хангаж ажиллахыг анхааруулж байна.

Гэнэтийн хуй салхины улмаас барилгын талбайн эмх цэгц хангалтгүй байсны улмаас барилгын хавтан салхинд хийсэж, барилгын талбайд ажиллаж байсан нэг хүнийг гэмтээж, нэг хүн нас барсан харамсалтай осол гарсан.

Мөн барилгын талбайд хураасан эд зүйлс барилгын хашааг давж нийтийн эзэмшлийн зам талбайд байсан автомашиныг эвдсэн хэрэг гарсан юм. Тэгэхээр барилгын компаниуд аюулгүй байдлаа хангаж, хүчтэй салхинд хийсэж, болзошгүй эд зүйлсийг хурааж, бэхлэх хэрэгтэй талаар анхааруулав.

---