ОХУ-ын Буриадад суралцаж буй 200 гаруй Монгол оюутныг маргаашнаас эхлэн Алтанбулаг боомтоор нэвтрүүлэхээр болсон талаар бид өмнө мэдээлсэн.

Харин хоёр улсын хилийг түр нээж оюутан сурагчдыг хил нэвтрүүлэх ажлыг хэрхэн зохион байгуулах тухай асуудлаар өчигдөр орой Монгол Улсаас ОХУ-ын Улаан-Үүд хотод суугаа Ерөнхий консулын газар Буриадын Шуурхай штабтай видео хурал хийн тохиролцсон байна.

УОК-ын Шуурхай штабаас тусгаарлах байр, тээврийн хэрэгслийн нөөц боломжоос хамаааран эх орондоо буцах хүсэлтэй иргэдийг 2020 оны 5 дугаар сарын 14-ний өдрийн 8:00-21:00 цаг, 2020 оны 5 дугаар сарын 15-ны өдөр 8:00-21:00 цагийн хооронд хилээр нэвтрүүлэхээр шийдвэрлэжээ.

Буриадаас эх орон руугаа буцаж буй оюутнуудыг тусгай автобусаар тээвэрлэн Алтанбулаг боомт руу хүргэх бөгөөд замын хүнс, ус, тээврийн зардал зэргийг Буриадын боловсролын яам хариуцахаар болжээ.  

Харин ОХУ-ын Буриадад байрлаж буй бусад иргэд өөрсдийн хувийн унаагаар болон Улаан-Үдийн авто вокзал дээрээс шугамын автобусаар Алтанбулагийн хил хүртэл зорчиж эх орондоо ирэх боломжтой юм байна.

---