Шуурхай штабын баасан гарагийн хуралдаан дээр ОБЕГ-ын дарга, хошууч генерал Т.Бадрал ирэх даваа гарагаас орон нутгийн хөдөлгөөнд өөрчлөлт оруулна гэж ярьсан. Улмаар "Иргэдийн анхаарал сүүлийн үед сулраад байна уу даа. Даваа гарагаас зарим хязгаарлалтын ажлуудыг хэрэгжүүлж эхэлнэ. Иргэдийн хөдөлгөөнийг хязгаарлах тал руугаа анхаарч ажиллана гэж бодож байгаа" хэмээн мэдэгдсэн. 

Үүнийг баталсан албан тоот аймаг, нийслэлийн Засаг дарга нарт хүргэгдсэн байдаг. Энэхүү албан тоот гарахаас өмнө орон нутгийн замыг хааж, хөдөлгөөнийг хязгаарлах тухай иргэдийн дунд гарч, багагүй төөрөгдөл үүсгэсэн юм. 

Харин дээрх шийдвэрийн тайллыг өнөөдөр болсон Шуурхай штабын хурал дээр ОБЕГ-ын дэд дарга, хурандаа Б.Ууганбаяр тайлж, "Аймаг, нийслэлийн Засаг дарга нарт автомашины тэгш, сондгойгоор нь хөдөлгөөнд оролцуулах шийдвэрийг хүргүүлсэн. Энэ арга хэмжээ Үндэсний хэмжээнд даваа гарагаас хэрэгжинэ" гэж мэдэгдсэн юм. 

Хурандаа Б.Ууганбаярын мэдэгдлийн дараа цахим сүлжээнд "Автомашинуудыг хорьчихоор, автобусандаа чихэлдээд, жинхэнэ эрсдэлтэй нөхцөл байдал үүсэх юм биш үү" гэсэн шүүмжлэл өрнөсөн. 

Гэтэл Шуурхай штабын мэдэгдлийн дараахан Засгийн газар болон Нийслэлийн хэвлэлийн албанаас үүнийг үгүйсгэж, "Албан ёсны шийдвэр гараагүй. Тэгш, сондгойгоор зорчуулах шийдвэр гараагүй" гэсэн нь УОК, Засгийн газартай уялдаа холбоогүй ажилладгийг харууллаа. 

Энэ шийдвэрийн талаар Тээврийн цагдаагийн албаны Урьдчилан сэргийлэх хэлтсийн дарга, цагдаагийн хошууч Э.Энхболд тодруулга өгснийг товчлон хүргэе. 

Цагдаагийн хошууч Э.Энхболд: "Тэгш, сондгойгоор зорчуулах албан ёсны шийдвэр гараагүй. ОБЕГ-ын даргын албан тоот 10-нд гарсан. 12-ны байдлаар буюу өнөөдрийн байдлаар энэ шийдвэр гараагүй. Иймд маргаашаас 1 ба 6-аар төгссөн дугаартай машинууд зорчихгүй, бусад автомашинууд хэвийн зорчино" гэдгийг хэллээ. 

---