ОХУ-ын Ерөнхий прокурорын орлогч, Армийн ерөнхий прокурор Валерий Петров нь Буриадын Уст-Ордын Нүхтийн районд /Нукут/ төрсөн буриад гаралтай нэгэн.

Тэрээр  Москвад суралцаж буй монгол оюутнуудад олон тооны амны хаалт, бээлий тусламж болгон өгчээ. Тэрээр тусламжийн зүйлс гардуулан өгөхдөө “Бид ирээдүйгээ өнөөдөр хамгаалах ёстой” хэмээн өгүүлсэн байна. Түүний энэхүү бэлэгт Москвад суралцаж байгаа монгол оюутнууд талархсан сэтгэгдлээ цахимаар олонтаа илэрхийлжээ.

ОХУ-ын Армийн ерөнхий прокурор Валерий Петров нь Эрхүүгийн их сургуулийн төгсөгч юм байна. Монгол Улсын Дээд шүүхийн дарга агсан Д.Дэмбэрэлцэрэнгийн хүү, хуульч Д.Мөнх-Эрдэнэ “Валерий Петров гуай Эрхүүгийн хуулийн факультетийн төгсөгч. Оюутны байранд аавтай цуг нэг өрөөнд байсан гэдэг” хэмээн хуучилжээ.

Валерий Петров нь Монгол Улсын прокурорын байгууллагын хүндэтгэлийн тэмдэгтэй нэгэн аж.

Москва дахь монгол оюутнууд тун хүнд байдалд байгаа мэдээлэл Шуурхай штабт ирээд байгаа. ОБЕГ-ын дарга, Бригадын генерал Т.Бадрал "Москвагаас 270 гаруй оюутан буцах хүсэлтээ гаргасан. Хэрэв бид оюутнуудыг татан авахгүй бол амь нас нь эрсдэлд орно. Маргааш өглөө /өнөөдөр буюу 2020.04.11/ Москвагаас Улаан-Үд рүү онгоцоор ирнэ. Гадаадад коронавирусийн халдвар авсан долоон иргэний хоёр нь Москвад байгаа” гэж мэдээлсэн билээ. 

---