Жүдо бөхийн энэ оны хамгийн сүүлийн буюу жин тус бүрийн шилдэг тамирчид урилгаар зодоглох Чиндао Мастерс тэмцээн БНХАУ-ын Чиндао хотноо зохион байгуулагдаж байна.

Өнөөдөр тэмцээний эхний өдөр уламжлал ёсоор эрэгтэйчүүдийн -60кг, -66кг, эмэгтэйчүүдийн -48кг, -52кг, -57кг жингүүдэд манай улсаас МУГТ М.Уранцэцэг, хөдөлмөрийн баатар Д.Сумьяа тэргүүтэй 10 бөх барилдаж байна. 

Уг тэмцээн БНХАУ-д зохион байгуулагдаж буй тул хэсгийн барилдаануудыг шууд дамжуулах боломжгүй байгаа тул манай сайт тэмцээний явцын мэдээллийг шуурхай мэдээлж байна. 

Манай тамирчид одоогийн байдлаар:

Эрэгтэйчүүдийн -60 кг жин: 

• Залуучуудын дэлхийн аваргын хүрэл медальт Л.Өнөболд эхний тойрогт Бразилын Такаватаке Эриктэй барилдан нэмэлт цагт ялж хоёрдугаар тойрогт Италийн Лука Мхейдзитэй барилдан торгуулиар цэвэр яллаа. А хэсгийн аваргын төлөө дэлхийн аваргын алт, хошой хүрэл, Мастерс тэмцээний аварга Японы алдарт Нагаяматай барилдан нэмэлт цагт ялагдан дагах барилдаан хийхээр боллоо. 
• Дэлхийн аваргын мөнгөн медальт Д.Амартүвшин эхний тойрогт Украйны Артём Лесиуктай барилдан нэмэлт цагт торгуулиар ялагдлаа. Уг барилдаанд манай бөх вазаригаар тэргүүлж байсан ч цагийн төгсгөлд ваза-ари алдан нэмэлт цагийн барилдаан гарсан юм. 
• Дэлхийн аварга Г.Болдбаатар эхний тойрогт Германы бөхтэй барилдан Моритз Плафкитэй барилдан нэмэлт цагт ваза-аригаар ялагдан тэмцээнээ дуусгалаа. 

Эрэгтэйчүүдийн -66 кг жин:

• Ё.Басхүү эхний тойрогт гоц мөргөсөн ба хоёрдугаар тойрогт Италийн Килиан Влоучтэй барилдан нэмэлт цагт торгуулиар цэвэр ялсан. Улмаар гуравдугаар тойрогт БНХАУ-ын бөхтэй барилдан мөн нэмэлт цагт яллаа. Яг одоо В хэсгийн аваргын төлөө дэлхийн аврга Италийн Ломбардо Мануэлд ялагдан дагах барилдаан хийхээр боллоо. Дагах барилдаанд Украины домогт бөх Жеоржи Зантариятай барилдана.
• Г.Хэрлэн мөн эхний тойрогт гоц мөргөсөн ба хоёрдугаар тойрогт Германы бөхийг нэмэлт цагт ваза-ари мэхээр яллаа. Гуравдугаар тойрогт дэлхийн аваргын хүрэл медальт Нижат Шихализадатай барилдан нэмэлт цагт ялалт байгууллаа. Улмаар D хэсгийн аваргын төлөө дэлхийн аваргын хүрэл медальт Маргвелашвили Вазатай барилдана. 

Эмэгтэйчүүдийн -48 кг жин:

• МУГТ М.Уранцэцэг эхний тойрогт Мексикийн бөхийг торгуулиар цэвэр ялсан. Улмаар хоёрдугаар тойрогт Азербайжаны Лейла Алиеватай барилдан цэвэр яллаа. В хэсгийн аваргын төлөө ОХУ-ын Ирина Долговатай барилдан нэмэлт цагт яллаа. Хоёр бөхийн хувьд гурав дахь жилдээ Мастерс тэмцээнд таарч байгаа ба манай бөх түүнд өмнө нь хоёр удаад ялагдаад байлаа. М.Уранцэцэг аварга тун удахгүй хагас шигшээд дэлхийн аваргын алт, хүрэл медальт Косовогийн Красники Дистриатай барилдана. Хоёр бөхийн даваа, унааны харьцаа 1, 1 байгаа бол энэ удаагийн барилдаан хайнаа хагалах барилдаан болох нээ. 
• Залуучуудын ДАШТ-ий хүрэл медальт Г.Наранцэцэг эхний тойрогт олимп, дэлхийн хүрэл медальт Унгарын Цэрновицки Эватай барилдан ваза-ари мэхээр яллаа. Хоёрдугаар тойрогт Португалийн Коста Катаринатай барилдана нэмэлт цагт ялж С хэсгийн аваргын төлөө Францын Клементтэй барилдана. 

Эмэгтэйчүүдийн -52кг жин:

• Б.Хорлоодой эхний тойрогт Гвиней-Бисау улсын жүдоч Цезар Такианатай барилдан нэмэлт цагт торгуулиар цэвэр яллаа. 
• Харин D хэсэгт залуучуудын олимпийн мөнгө, залуучуудын дэлхийн аварга Л.Сосорбарам эхний тойрогт БНСУ-ын Пак Да Солтой барилдан нэмэлт цагт ялагдлаа. 

Эмэгтэйчүүдийн -57 кг жин:

• Олимпийн мөнгө, дэлхийн аваргын алт, хошой хүрэл медальт, Мастерс тэмцээний дөрвөн удаагийн аварга, хөдөлмөрийн баатар, МУГТ Д.Сумъяа аварга эхний тойрогт дэлхийн аваргын мөнгөн медальт Францын залуу тамирчин Сара Леониетэй барилдан ялагдал хүлээж тэмцээнээ дуусгалаа. 

Манай сайт хэсгийн барилдааны тойм мэдээг цаг алдалгүй шуурхай мэдээлнэ.