Нийслэл дэх Захиргааны хэргийн анхан шатны шүүхийн хэвлэл мэдээлэл, олон нийттэй харилцах мэргэжилтэн Ж.Амаржаргал "Дархан Монгол ногоон нэгдэл" ТББ-ын нэхэмжлэлтэй шүүхийн шийдвэрийг албан ёсоор танилцуулав.

"Дархан Монгол ногоон нэгдэл" ТББ нь нийтийн өмчийг хамгаалах зорилгоор Нийслэл дэх захиргааны хэргийн анхан шатны шүүхэд Ерөнхий сайд Ч.Сайханбилэгийн 2015 оны 4 захирамжийг илт хууль бус болохыг тогтоолгохоор хандсан. Ингээд өнгөрсөн сарын 18-ны өдрийн шүүх хурлаар Ерөнхий сайдын 4 захирамжуудыг хүчингүй болгосон шийдвэр гаргасан.

Тэгвэл уг шийдвэр гаргасны дараа "Дархан Монгол ногоон нэгдэл" ТББ-аас хэвлэлийн бага хурал зарлаж, Оюу толгойн гэрээ хүчингүй болсон гэх тайлбарыг өгч байсныг бид өмнө дамжуулсан.

Тэгвэл шүүхээс маргаан бүхий захирамжуудыг илт хууль бус болохыг тогтоосноор төрийн гүйцэтгэх эрх мэдлийн дээд байгууллагын тэргүүн Ерөнхий сайдаас илт хууль бус захирамж гаргахгүй байх, дараагийн шийдвэр гаргах үйл ажиллагаандаа нийтийн өмчийг хамгаалах, нийтийн эрх, ашиг сонирхолд нийцүүлэн шийдвэр, үйл ажиллагаагаа хэрэгжүүлэх хэрэгтэй гэж дүгнэсэн.

Маргаан бүхий 4 захирамжийг илт хууль бус болохыг шүүхээс тогтоосноор эдгээр захирамжийн эрх зүйн үр дагавраас үүссэн бусад харилцаа /түүний дотор санхүүжилтийн төлөвлөгөө гэж нэрлэгдэх хөрөнгө оруулалтын гэрээ/-ны хүчин төгөлдөр байдлыг хөндөхгүй, түүнд нөлөөлөхгүй болно.

Учир нь маргаан бүхий захирамжийн эрх зүйн үр дагавраас үүссэн эрх зүйн бусад харилцаа нь тусдаа өөр төрлийн харилцаа, бусад төрлийн эрх зүйн актад хамаарч байх тул бусад харилцаа ялангуяа "Оюу толгой төслийн далд уурхайн бүтээн байгуулалтын ажлын санхүүжилтийн төлөвлөгөө"-ний хүчин төгөлдөр байдлыг хөндөхгүй, түүнд нөлөөлөхгүй гэдгийг албан ёсны шүүхийн шийдвэрээр баталгаажуулсан байна.

Энэ асуудлаар маргаан үүсвэл тухайн гэрээнд заасны дагуу шийдвэрлэнэ. Захиргааны шүүхээр шийдвэрлэсэн энэ маргаанд хамааралгүй. 

---