Киргизстан улсын нийслэл Бишкек хотноо дэлхийн шилдэг ширэн бээлийтнүүд цугласан 43 дахь удаагийн Дуйсенкул Шопоковын нэрэмжит олон улсын боксын тэмцээн болж өнгөрлөө. Уг тэмцээнд монголын боксын үндэсний шигшээ багийн дасгалжуулагч Баяраа, М.Буянжаргал нарын удирдлага дор эрэгтэй, эмэгтэй тус бүр дөрвөн тамирчин амжилттай оролцож нэг алт, нэг хүрэл медаль хүртлээ. Тодруулбал эмэгтэйчүүдийн 75кг жинд "Ширэн бээлий" клубийн тамирчин ОУХМ М.Мягмаржаргал алтан медаль хүртсэн бол "Монгол эрч" клубийн тамирчин, Ази тивийн аварга шалгаруулах тэмцээний хүрэл медальт ОУХМ О.Жаргалан 49кг жинд хүрэл медаль хүртлээ. 

ОУХМ О.Жаргалангын хувьд дэлхийн чансааны 14-т эрэмбэлэгдэж байгаа бол ОУХМ М.Мягмаржаргалын хувьд дэлхийн чансааны 25-т эрэмбэлэгдэж байгаа бөгөөд өнгөрсөн жил ОХУ-д Коротковын нэрэмжит олон улсын тэмцээнээс хүрэл медаль, 2016 онд Чингис хаан эмэгтэйчүүдийн боксын олон улсын цомын тэмцээнд түрүүлж байсан монголын шилдэг тамирчин юм. 

ОУХМ М.Мягмаржаргалын хагас шигшээ тулаанд Беларусийн Алина Вебертэй хийсэн тулааны бичлэгийг бүрэн эхээр нь толилуулж байна.