Мэргэжлийн снукер биллиардын дэлхийн нээлтэй тэмцээний (World Open) хоёрдугаар тойргийн тоглолтууд явагдаж өндөрлөлөө.
Хоёрдугаар тойргийн онцлох тоглолтоор 2005 оны дэлхийн аварга Шаун Мөрфи аварга хятадын залуу тамирчныг 5:0 харьцаагаар буулган авсан тоглолтыг нэрлэх нь зүйтэй болов уу. Тоглолтын төгсгөлд Шаун Мөрфи аварга снукер биллиардын хамгийн өндөр оноо болох 147 оноо авч үзэгч олныг баясгалаа. Шаун Мөрфи энэ улиралд хоёр дахь удаагаа 147 оноо авч байгаа бол карьерынхаа 10 дахь 147 оноо авсан нь энэ юм. Ингэснээр 10-аас дээш удаа 147 оноо авсан дөрөв дэх биллиардчин болж байна. Тодруулбал: Снукер биллиардын түүхэнд дараах эрхмүүд хамгийн олон удаа 147 оноог авч түүхэнд нэрээ үлдээсэн байдаг.
- Ронни О Сулливан 15 удаа
- Жон Жиггинс 13 удаа
- Стивен Хендри 11 удаа
- Шаун Мөрфи 10 удаа тус тус 147 оноо авсан байна.
Мөрфи аварга энэ оны эхэнд зохион байгуулагдсан Мастерс тэмцээнд мөн 147 оноо авч улмаар түрүүлснийг биллиард сонирхогчид маань сайн мэдэж байгаа биз ээ. Дэлхийн чансааны 8-д эрэмбэлэгдэж буй түүний хувьд бэлтгэл тун сайтай байгаагаа харуулсаар байна.
Жич: Спортын мэдээ, мэдээллийн www.livetv.mn/sport сувгийн зүгээр снукер биллиардын хамгийн өндөр оноо болох 147 онооны талаар тун удахгүй дэлгэрэнгүй тайлбар мэдээлэл оруулах болно.
Хуваарь ёсоор өнөөдөр (хоёрдугаар сарын 25-ны өдөр) шөвгийн 32 тамирчны тоглолтууд явагдах ба онцлох оноолтыг дурдвал Ираны Хосейн Вафай Хятадын Динг Жунхуйтай, Жадд Трамп аварга Жое О Коннортой оноолт таарсан байна.
