Зуны спортын XXXIII наадмын жүдо бөхийн төрөл өнөөдөр (7.28) хоёр дахь өдрөө үргэлжлэн явагдана. 

Өнөөдөр эрэгтэйчүүдийн -66кг, эмэгтэйчүүдийн -52кг жингийн барилдаанууд явагдах ба манай улсаас дэлхийн аваргын хошой хүрэл медальт, МУГТ Ё.Басхүү, залуучуудын олимпын мөнгө, залуучуудын дэлхийн аварга Л.Сосорбарам нараас гадна Арабын нэгдсэн Эмират улсын нэр дээрээс Мастерсийн хүрэл медальт Б.Нармандах болон Азийн наадмын мөнгө, Ази тивийн аварга Б.Хорлоодой хүч үзнэ. 

МУГТ Ё.Басхүү, Б.Нармандах нарын оноолт болон өрсөлдөгчдийн мэдээллийг ЭНД дарж үзнэ үү. 

Тэгвэл одоо Л.Сосорбарам, Б.Хорлоодой нарын оноолт болон өрсөлдөгчдийн дэлгэрэнгүй мэдээллийг хүргэж байна.  

Эмэгтэйчүүдийн -52кг жин:

Эмэгтэйчүүдийн -52кг жинд 26 тамирчин хүч үзэх ба А хэсгийг дэлхийн аваргын хошой мөнгөн медальт Узбекистаны К.Диёора, В хэсгийг Токио 2020 олимпын мөнгө, дэлхийн аваргын таван хүрэл медальт Францын А.Бучард, С хэсгийг Токио 2020 олимпын аварга Косовогийн Д.Красники, D хэсгийг Рио-2016 олимпын мөнгө, Токио-2020 олимпын хүрэл медальт Италийн Г.Одетте тус тус тэргүүлж байна.

А хэсэгт Арабын нэгдсэн Эмират улсын нэр дээрээс барилдах Б.Хорлоодой эхний тойрогт БНХАУ-ын Зу Екингтэй учраа таарсан байна. Хоёр бөхийн хувьд өнгөрсөн оны Душанбегийн гранприд учраа таарч Зу Екинг ялсан байдаг. Энэ хэсэгт Токио-2020 олимпын аварга, дэлхийн дөрвөн удаагийн аварга Японы алдарт Абе Ута бий. 

Л.Сосорбарам D хэсэгт хуваарилагдсан ба эхний тойрогт энэ оны Тбилисийн их дуулгын аварга Испанийн Т.С.Арианетай учраа таарсан байна. Хоёр бөхийн хувьд энэ оны дэлхийн аварга шалгаруулах тэмцээнд учраа таарч Л.Сосорбарам ялагдсаныг жүдо сонирхогчид маань сайн санаж байгаа биз ээ. Хоёр бөхийн хэн ялсныг Мастерсийн хүрэл медальт Унгарын П.Река хүлээж байна. Л.Сосорбарамын хувьд П.Рекатай 2023 онд гурван удаа учраа таарахад нэг ялж, хоёр ялагдаж байсан түүхтэй. 

Манай бөхчүүд өнөөдөр Улаанбаатарын цагаар 16:00 цагт барилдах хуваарьтай байгаа. 

Амжилтын дээдийг хүсэн ерөөе.