Турк улсын Анталя хотноо жүдо бөхийн уламжлалт Анталя их дуулга тэмцээн өнөөдөр албан ёсоор эхэлнэ. 

63 орны 525 жүдоч хүч бол Монгол улсаас олимпын мөнгө, дэлхийн аварга С.Моллай тэргүүтэй эрэгтэй 12, эмэгтэй зургаа буюу нийт 18 жүдоч хүч үзнэ. 

Энэ сарын 1-нээс 4-ний өдөр хүртэл үргэлжлэх тус тэмцээний эхний өдөр буюу өнөөдөр уламжлал ёсоор хөнгөн жингийн барилдаанууд явагдах ба манай улсаас дараах бөхчүүд зодоглоно. 

Эрэгтэйчүүдийн -60кг жин: А хэсэгт залуу мастер Б.Сүхбат эхний тойрогт гоц мөргөж улмаар тус жинг тэргүүлэн барилдаж буй олимпын мөнгөн медальт Тайванийн Ян Юун Вейтэй оноолт таарсан байна. Харин С хэсэгт Парисын их дуулга тэмцээний хүрэл медальт ОУХМ Э.Ариунболд эхний тойрогт Кубын бөхтэй учраа таарсан байна. 

Эрэгтэйчүүдийн -66кг жин: Энэ оны Парисын их дуулга тэмцээнд түрүүлсэн ОУХМ Ё.Басхүү С хэсгийг тэргүүлэн барилдах тул эхний тойрогт гоц мөргөж улмаар хоёрдугаар тойрогт Туркын залуу бөхтэй барилдах оноолттой байна. Харин Мастерсийн аварга ОУХМ Г.Хэрлэн D хэсэгт байгаа ба мөн л эхний тойрогт гоц мөргөсөн байна. 

Эмэгтэйчүүдийн -48кг жин: Залуучуудын ДАШТ-ий хүрэл медальт ОУХМ Г.Наранцэцэг А хэсгийн эхний тойрогт өнгөрсөн оны Бакугийн их дуулгын мөнгөн медальт Австрийн Танзер Катаринатай учраа таарсан байна. Харин С хэсэгт энэ оны Парисын их дуулгын мөнгө, Тел Авивын их дуулгын хүрэл медальт Б.Баасанхүү эхний тойрогт Тайванийн бөхтэй учраа таарсан байна. 

Эмэгтэйчүүдийн -52кг жин: Абу Дабы, Баку, Парис, Дюсселдорфийн их дуулгуудын хүрэл медальт ОУХМ Б.Хорлоодой А хэсгийн эхний тойрогт гоц мөргөсөн байна. Улмаар хоёрдугаар тойрогт Их Британийн бөхтэй учраа таарсан байна. 

Эмэгтэйчүүдийн -57кг жин: ОУХМ Л.Энхрийлэн эхний тойрогт Унгарын бөхтэй учраа таарсан байна. 

Хэсгийн барилдаан Улаанбаатарын цагаар 14 цагт эхлэх бол шигшээ барилдаан 22 цагаас эхлэх хуваарьтай байна.