Мэргэжлийн снукер биллиардын 2020 оны анхны тэмцээн эхэллээ. 

Мэргэжлийн снукер биллиардын хамгийн нэр хүндтэй "Triple Crown" ангиллын гурван тэмцээний нэг болох Мастерс тэмцээн Лондон хотноо эхэллээ. Дэлхийн чансааны эхний 16-д эрэмбэлэгдэж буй шилдэг 16 тамирчинг урилгаар оролцуулдаг Мастерс тэмцээн 1975 оноос хойш уламжлал болон зохион байгуулагдсаар ирсэн юм. 

Түүхийг сөхөн үзвэл домогт Ронни О Сулливан аварга Мастерс тэмцээнд хамгийн олон буюу долоон удаа түрүүлж өнгөрсөн жил Жадд Трамптай аваргын төлөө тоглон хожигдсоноор зургаа дахь удаагаа үзүүрлээд байна. Манай сайт жилийн өмнө мастерс тэмцээнийг снукер биллиард сонирхогчдодоо зориулан толилуулж байсан ба шигшээ тоглолтыг эргэн үзэхийг хүсвэл ЭНД дарна уу. Дэлхийн чансааны 3-т эрэмбэлэгдэж буй Ронни энэ жилийн Мастерс тэмцээнийг өнжихөөр болсон байна.  

Урьд шөнө нэгдүгээр тойргийн эхний хоёр тоглолт явагдлаа.

Али Картер /Д.Ч-17/ 6:4 Марк Селби /Д.Ч-4/

/Д.Ч- Дэлхийн чансаа/

Мастерс тэмцээний хамгийн эхний тоглолтод Али Картер дэлхийн гурван удаагийн аварга Марк Селбиг 6:4 харьцаагаар хожин шуугиан тарилаа. Али картерийн хувьд дэлхийн аварга шалгаруулах тэмцээнд хоёр удаа үзүүрлэхдээ хоёуланд нь Ронни О Сулливанд хожигдож байсан түүхтэй. 

Жое Перри /Д.Ч-16/ 6:3 Динг Жунхуй /Д.Ч-9/

2017 оны Мастерс тэмцээнд үзүүрлэж байсан Жое Перри 2011 оны Мастерс тэмцээний аварга Динг Жунхуйг 6:3 харьцаагаар хожин хоёрдугаар тойрогт шалгарч үлдлээ. Хоёр тамирчны хувьд 23 дахь удаагаа учраа таарсан нь энэ бөгөөд Жое Перри Мастерст үзүүрлэдэг жилээ буюу 2017 онд Дин Жунхуйг хагас шигшээд хожсоноос хойш нэг ч хожоогүй байсан юм.