Энэ долоо хоногт  Нобелийн шагналын эзэд тодорсоор байна. Физикийн салбарт Нобелийн шагнал хүртсэн эрдэмтдийг зарлалаа. Энэ жилийн Физикийн Нобелийн шагналтнууд тал бүрээрээ өмнөх жилүүдийнхээс онцлог байв.

Юун түрүүнд 55 жилийн дараа анх удаа эмэгтэй эрдэмтэн Физикийн ухааны салбарт Нобелийн шагнал хүртлээ. Хатагтай Донна Стрикланд уг салбарт тус шагналыг авсан ердөө гуравдахь эмэгтэй эрдэмтэн юм. Тэрээр Америкийн эрдэмтэн Артур Ашкин болон Францын эрдэмтэн Жерард Мюрю нарын хамт нэр хүндтэй шагналын эзэн боллоо.

Хэт богино туяаны лазер физик эмчилгээний ажлаараа тэд шилдгүүд болсон. Доктор Ашкин дурангийн хямсаа буюу чимхүүрийг лазераар хэрхэн орлуулж болохыг хөгжүүлэн судалсан бол Доктор Мюрю, Стрикланд нар урьд өмнө байгаагүй хамгийн богино, хүчтэй давтамжтай лазерыг ашиглах эхлэлийг тавьжээ. Тэд техникээ хөгжүүлэн хорт хавдартай өвчтнүүдэд болоод нүдний хагалгаанд ашигласан байна.

55 жилийн дараа Физикийн салбарт Нобелийн шагнал хүртсэн 59 настай Донна Стрикланд Канадын Ватерлү Их сургуулийн дэд профессороор ажилладаг. Википедиа цахим мэдээллийн хуудас энэ оны 5 дугаар сард Стрикландын тухай мэдээлэлдээ түүний Нобелийн шагнал хүртсэн хэт богино туяаны лазерын ажлын талаар дэлгэрэнгүй танилцуулахаас татгалзжээ. Учир нь энэ ажил шинэлэг, бас ач холбогдолтой гэж үзээгүй байна. Түүнийг Нобелийн шагнал хүртсэний дараа ч Википедиа ажлынх нь талаар онцолж, өгүүллэг оруулаагүй хэвээр байгаа юм.

Донна Стрикландын ажлыг дутуу үнэлж байгаа нь ганцхан Википедиа биш юм. Их сургуулийн профессор биш дэд профессор дэлхийн хамгийн нэр хүндтэй шагнал авсанд сэтгэл дундуур хүмүүс ч байна. Шагналаа гардаж авч буй цаг хагасын шууд дамжуулалтын дараа энэ талаарх цахим хайлт 17 хувьтай байжээ.

Эх сурвалж: www.bbc.com, www.qz.com

---