Энэ зуны хүлээлт эвдсэн, цоо шинэ, өвөрмөц арга хэмжээ “LEGEND” ENTERTAINMENT SHOW” тоглолт  ирэх сарын 7-12-ны өдөр “Corporate Hotel & Convention Centre”-ийн концертын их танхимд болно.

Нүүдэлчдийн язгуур урлаг орчин үеийн хэлбэрт уусан шингэж театр, хөгжим, дуу, шинэ үеийн бүжиг, балет, уран нугаралт, акробат хослон зохицсон цогц хэлбэрийн энтертайнмент шоу тоглолт болон мэндлэх гэж байна.

Энэхүү шоу тоглолт ариун сэтгэл, хагацашгүй хайрын бэлгэдэл бэр цэцгийн домгийг өгүүлж танд хүрнэ. Домогт мөнхөрсөн үнэнч сэтгэл, ариун хайрын түүхийг Төрийн соёрхолт, найруулагч Н.Наранбаатар найруулж, мэргэжлийн 120 гаруй уран бүтээлч уг түүхийг өөр өөрсдийн өнгө аясаар толилуулах гэнэ. Энтертайнмент шоу тоглолт учраас тоглолтын үеэр дуу чимээ, ая хөгийг шинээр зохиосноос гадна ардын дуу, бүжиг сэлтийг орчин үеийн хэв маягт оруулж найруулсан талаар дууны найруулагчаар ажиллаж буй хөгжмийн зохиолч Д.Түвшинсайхан дурдаж байлаа.

Монгол ардын урлагийн баялаг өв, сонгодог болон орчин үеийн урлагийн гайхамшиг нэгдэн ДОМОГ амилуулна гэдгийг зохион байгуулагчдын зүгээс хэлсэн бөгөөд анх удаа ийм шоу зохион байгуулж буй гэнэ. Бид ардын урлагаар дэлхийд гайхагдагч олон түмэнд хүргэхийн тулд орчин үеийн урлагтай нийцүүлж дэлхийд өөрсдийн урлагаа таниулах боломжтой. Legend шоу үзсэнээр өөрийн дотоод сэтгэлийн нүүдэлчин ардын сэтгэл мэдрэмжийг мэдрэх сэтгэлгээний цар хүрээг тэлсэн тоглолтыг үзэгч олонд болон жуулчдад зориулан найруулсан хэмээн Төрийн соёрхолт, найруулагч Н.Наранбаатар дурдаж байлаа.

МУГЖ Б.Мөнхбаатар болон дуучин Д.Үүрийнтуяа, Д.Жавхаасайхан, Х.Эрдэнэцэцэг, О.Анхчимэг, Б.Алтанжаргал, Т.Баянжаргал, Б.Баатархүү нарын уртын дуучид, хөөмийч Ж.Мэндбаяр, “Номадик балет” продакшны балетын жүжигчид, ХЦДБЭЧ-ын бүжигчид, Enkhe boys циркийн нугараачид, акробатчид гээд нийт120 гаруймэргэжлийн уран бүтээлч “LEGEND” entertainment show” тоглолтод оролцох аж.

 

 

 

 

---