Тагнуулын Ерөнхий Газар/ТЕГ/-ын дарга асан Б.Хурцаас УИХ-ын гишүүн Л.Болд уучлал гуйх шаардлагатай болжээ. Учир нь Улсын Дээд шүүх Б.Хурцын нэхэмжлэлтэй, УИХ-ын гишүүн Л.Болдод холбогдох хэргийг хэлэлцэж Б.Хурцын талд шийдвэр гаргажээ.

Өнгөрсөн 2017 онд ТЕГ-ын дарга асан Б.Хурцыг БНСУ-д суух элчин сайдаар томилох эсэх асуудлыг  Аюулгүй байдал, гадаад бодлогын байнгын хорооны хуралдаан дээр УИХ-ын гишүүн Л.Болд, элчин сайдад нэр дэвшигч Б.Хурц нарын дунд маргаан өрнөж, биесээ идэж, уусан, хууль бусаар ажилласан гэх зэргээр дуудалцсан билээ.

Харин уг асуудлаас үүдэн ТЕГ-ын дарга асан Б.Хурц нэр төрд халдсан хэргээр УИХ-ын гишүүн Л.Болдыг шүүхэд өгсөн бөгөөд шүүх хэлэлцээд дээрх шийдвэрийг гаргажээ.

УИХ-ын гишүүн Л.Болд тухайн үед Аюулгүй байдал, гадаад бодлогын байнгын хорооны хурал дээр “ТЕГ-ын дарга Б.Хурц олон хүнийг дарамталж амь насанд нь халдсан” гэх агуулгатай үг хэлж, Л.Болд, Б.Хурц нарын хооронд ширүүн маргаан өрнөж байсан юм.

Дээд шүүх  "Хариуцагчийн дээрх мэдээлэл бодитой, үнэн болохыг хариуцагч баримтаар нотлоогүй, тухайн мэдээлэл нь Б.Хурцын нэр төр, алдар хүндийг гутаасан агуулгатай" гэж үзсэн анхан шатны шүүхийн дүгнэлтийг хэвээр үлдээжээ.

Ингэснээр ТЕГ-ын дарга асах Б.Хурцын шүүхэд хандсан гомдол ёсоор нэр төрөө сэргээлгэж, уучлал гуйхыг УИХ-ын гишүүн Л.Болдод даалгажээ. 

Энэ талаар бид УИХ-ын гишүүн Л.Болдоос тодруулахаар холбогдсон ч албан ёсны тайлбар өгсөнгүй.

 

---