Холимог тулааны дэлхийн шилдэг холбоодын нэг болох OneChampionship холбооны Rich Franklin’s ONE Warrior Series цуврал тулаанд дараалан ялалт байгуулаад буй Монгол улсын шилдэг тулаанч З.Шинэчагтга ээлжит ялалтаа байгууллаа.

Тэрээр Rich Franklin’s ONE Warrior Series 6 цуврал тулаанд БНСУ-ын шилдэг тулаанч "Арслан" хочит Хюн Жин Лийг ердөө нэг минутын дотор хүнд цохилтоор буулган авсан юм. Солонгос тулаанч Хян Жин Лийгийн хувьд өмнөх өрсөлдөгчдөө бүгдийг нь дутуу гаргаж байсан бол энэ удаад Монгол тулаанчид хүчин мөхөстлөө. 

MGL-1 FC MAX K-1 65кг жингийн 2015 оны аварга, 2018 оны Мастер тулаанч шоуны хөнгөн жингийн аварга "Ширэн Бээлий" клуб, ZorkysMMA багийн тулаанч тамирчин Золцэцэгийн Шинэчагтга ийнхүү өрсөлдөгчөө ялснаар 100.000$ гэрээ байгуулах эрхтэй боллоо. 

Энэ өдөр шилдэг 32 тулаанчийн 16 тулаан гарсан ба оргил тулаанаар нь Монголын тулаанч З.Шинэчагтга болон БНСУ-ын Хюн Жин Лий нарын тулаан нэрлэгдээд байсан юм. Тулааны спорт сонирхогчдодоо зориулан энэ өдрийн бүх тулааны бичлэгийг толилуулж байгаа ба Монгол тулаанч З.Шинэчагтгын тулаан хамгийн сүүлийн тулаан нь юм. /3:19:15 цаг дээр тааруулан үзэх боломжтой/