Монгол Улсын Их Хурлын дарга Г.Занданшатарын урилгаар Швейцарын Холбооны Улсын Үндэсний Зөвлөлийн дарга, хатагтай Марина Кароббио Гүшэтти манай улсад албан ёсны айлчлал хийж байна. Түүнийг /2019.06.24/ УИХ-ын дарга Г.Занданшатар угтан авсны дараагаар ГХ-ийн сайд Д.Цогтбаатар хатагтай Марина Кароббио Гүшэттид бараалжээ. Улмаар хатагтай Марина Кароббио Гүшэтти Монгол Улсын Ерөнхийлөгч Х.Баттулгад бараалхсан байна.

Манай улс болон Швейцарь улс хооронд 2018-2021 онд хэрэгжүүлэх Хамтын ажиллагааны стратегийн хүрээнд хөдөө аж ахуй, хүнсний аюулгүй байдал, мэргэжлийн боловсрол, сургалт, захиргааны шинэтгэл, орон нутгийн засаглал, иргэний оролцооны чиглэлээр сүүлийн жилүүдэд Монгол Улсад 100 сая швейцар франкын буцалтгүй тусламж үзүүлжээ.

Энэ талаар Хатагтай Марина Кароббио Гүшэтти УИХ-ын даргатай хийсэн уулзалтынхаа үеэр,

Хоёр орны хөгжил, хамтын ажиллагааны хүрээнд хэд хэдэн салбарт амжилттай ажиллаж байгааг тэмдэглэн, тухайлбал, хөдөө аж ахуй ба хүнсний аюулгүй байдал, мэргэжлийн боловсрол, сургалт, засаглал зэрэг чиглэлд төвлөрч ажиллаж байгааг дурджээ. Түүнчлэн боловсролын салбарын хамтын ажиллагаа, тэр дундаа их дээд сургуулид, тэдгээрийн эрдэм шинжилгээ, судалгааны хамтын ажиллагааг өргөжүүлэн чанарыг нь дээшлүүлэх чиглэлээр Швейцарын Холбооны Улс, Монгол Улстай хамтран ажиллах боломж бий гэдгийг онцолсон байна. Үүнээс гадна соёл, боловсрол, судалгаа, инноваци, аялал жуулчлалын чиглэлээр хамтын ажиллагааныхаа хүрээг өргөжүүлнэ гэдэгт итгэлтэй байгаа тэмдэглэжээ. 

 

 

---