Өнөөдөр эцэг, эхчүүдийн төлөөллүүд БСШУЯ-ны харьяа Олон Улсын лаборатори “Шинэ эрин” сургуулийн элсэлтийн шалгалтын материал алдаатай байсны улмаас 1251 хүүхдийн эрх ашиг хохирсон талаар мэдээлэл хийв.

“Шинэ эрин” сургууль 2019 оны элсэлтийн шалгалтыг авахдаа нэг хүүхдээс 25 мянгөн төгрөгийн бүртгэлийн хураамж авсан бөгөөд элсэлтийн шалгалт зургаадугаар сарын 16-ны 11.00 цагт болжээ. Шалгалтыг авахдаа хүүхдүүдийн материалыг дэлгэцээр эцэг эхчүүдэд шууд дамжуулан үзүүлж, оноогоор жагсаах байдлаар үзүүлсэн аж. Гэтэл хүүхдүүдээс авсан элсэлтийн шалгалтын дараа шалгалтын материал алдаатай байсан нь мэдэгджээ. “Шинэ эрин” сургуулийн захирал Б.Амартүвшин “Манайх долоон жил шалгалт авахдаа алдаа гаргаж байгаагүй. Би 99.99 хувь итгэлтэй байна” хэмээн хэлснийхээ дараа шалгалтанд ирсэн алдаатай материалыг сольж, алдаагүй материал оруулсан” хэмээн тэд мэдэгдсэн юм.  

БСШУСЯ-ны харьяа “Шинэ эрин” Олон Улсын лаборатори сургуулийн шалгалтын материалыг Кембриджээс ирүүлсэн бөгөөд А вариант 6 онооны, Б вариант 5 онооны алдаатай байсан гэдгийг шалгалт авч байгаа багш нар өөрсдөө хүлээн зөвшөөрсөн гэх мэдээлэл байна.

БСШУС-ын сайд Ё.Баатарбилэг

“Шинэ эрин сургуулийн элсэлтийн шалгалт алдаатай байсан талаарх гомдол мэдээлэл надад эцэг эхчүүдээс ирсэн. Кембриджээс ирүүлсэн тестийг цагдаа, тагнуулын хяналтан дор өндөр нууцлалтайгаар орчуулж, элсэлтийн шалгалтаа авдаг юм билээ. Тэр тестийг Боловсролын яам, Боловсролын үнэлгээний төв хөндлөнгийн хянадаггүй. Тэгэх ч боломжгүй. Хаана ямар алдаа гарсны улмаас алдаа гарсныг би мэдэхгүй. Ирүүлсэн тест нь алдаатай тохиолдолд ямар журмаар шийдэхийг ч би мэдэхгүй” гэв.

---