Дэлхийд тэргүүлэх нисэх онгоц үйлдвэрлэгчдийн нэг Боинг компанийн 737 Мах загварын онгоцууд удаа дараалан гарсан ослын улмаас түр зогсолт хийгээд байгаа. Компанийн хувьцааны ханш унаж, борлуулалт буурсан ба ойрын хоёр сарын хугацаанд нэг ч захиалга ирээгүй байна.

Энэ үеэр Парисын агаарын шоу нээлтээ хийлээ. Эйрбус компани Боингтой өрсөлдөх алхмаа хийж Парисын агаарын шоун дээр шинээр үйлдвэрлэх холын зайн зорчигч тээврийн овор багатай нисэх онгоцоо танилцуулсан байна. Европын нисэх онгоц үйлдвэрлэгч компанийн шинэ загвар А321XLR буюу А321neo загварын шинэ хувилбар нь Боингийн 737 Мах загвартай өрсөлдөх гол бүтээгдэхүүн юм.

Хэмжээгээр бага ч илүү хол зай туулах боломжтой болсон ба Энэтхэгээс Европ руу, Хятадаас Австрали руу тив дамжин шууд нислэг үйлдэж том онгоцуудаас шатахуун бага зарцуулна. Одоогоор тив хоорондын нислэгийг овор хэмжээ том, шатахуун зарцуулалт их онгоцуудаар үйлдэж байгаа юм.

 

 

Reuters агентлагийн мэдээлснээр Парисын агаарын шоуны долоо хоногт Эйрбус шинэ загварын онгоцдоо 200 захиалга авахаар төлөвлөж байна. Ойрхи Дорнодын нислэгийн компаниуд А321XLR загвараас дөрвийг захиалсан ба анхны нислэгээ 2023 онд үйлдэх юм байна. Мөн Калифорнид төвтэй Air Lease корпораци Эйрбус компаниас 27 шинэ онгоц, А220-300 загвараас 50 ширхэг, А321neo загвараас 23 ширхэг гээд нийт 11 тэрбум ам.долларын онгоц худалдаж авах гэрээнд гарын үсэг зуржээ.

 

Эх сурвалж: www.theguardian.com

---